АҚШ президенти Доналд Трамп ҲАМАС гуруҳига Ғазо секторидаги урушни тугатиш бўйича Вашингтон таклиф қилган келишувни қабул қилиш учун янги муддат белгилади. 

"Ҳозироқ гаровга олинганларга озод этинг ва жасадларни топширинг. Сизларга якшанба куни (5 октябр)соат 15:00 гача муҳлат бераман", - деб ёзди у ўзининг Truth Social ижтимоий тармоғидаги саҳифасида. 

АҚШ 29 сентябр куни Исроил ва ҲАМАС ўртасидаги урушни тугатиш режасини тақдим этди. Унинг бандларидан бирида ҲАМАС барча гаровга олинганларни, шу жумладан ўлганларнинг жасадларини "Исроил ушбу келишувни жамоатчилик томонидан қабул қилганидан кейин" 72 соат ичида қайтариши кераклиги айтилган.

Бу ўт очишни тўхтатиш ва Исроил қўшинлари "гаровга олинганларни озод қилишга тайёргарлик кўриш учун келишилган чизиққа" олиб чиқилганидан кейин содир бўлади. 

Бунинг эвазига Исроил умрбод қамоқ жазосини ўтаётган 250 нафар фаластинлик маҳбусни ва 2023 йил 7 октябр куни ҲАМАСнинг Исроил жанубий ҳудудларига уюштирган ҳужумидан сўнг ҳибсга олинган 1700 нафар ғазоликни озод қилади. Бундан ташқари, озод этилган ҳар бир асирга Исроил “15 нафар ҳалок бўлган ғазоликларнинг жасади”ни қайтаради. 

Ушбу мажбуриятларни бажаргандан сўнг, ҲАМАС аъзолари амнистия ва Ғазо секторидан хавфсиз ўтиш эвазига қуролларини топширишади. Гуруҳ Ғазо секторини бошқаришда ҳеч қандай ролга эга бўлмайди ва "барча ҳарбий, террористик ва ҳужумкор инфратузилма" йўқ қилинади.