2025 йилнинг 17 октябрида Бухоро вилояти Қоровулбозор тумани ҳудудида қўйларини боқиб юрган чўпон томонидан усти қисман тупроқ билан ёпилган эркак кишининг жасади топилди.

Туркиялик ишбилармон Кадир Тунчга тегишли экани маълум бўлган ушбу жиноят Ўзбекистон ва Туркия ҳуқуқ-тартибот идораларининг ҳамкорлиги натижасида қисқа вақт ичида очилди. Олиб борилган махсус операция давомида 4 нафар гумонланувчи Истанбулда қўлга олинган.

Маълум қилинишича, тергов ҳаракатлари давомида марҳум пичоқланиб ўлдирилгани аниқланди. Ҳудуддан ўтган автомашиналар ўрганилиб, шубҳали транспорт воситасининг давлат рақами белгиланди.

Маълум бўлишича, мазкур автомобиль Истанбулда яшовчи 51 ёшли Суат Т. томонидан ижарага олинган. Машинада ўтказилган текширув натижасида унда қон излари топилди. Экспертиза қон намуналари жасадга тегишли эканини тасдиқлади.

Ўзбекистон томонидан олинган маълумотлар Туркия полициясига юборилди. Истанбул полицияси Қотиллик бўлими ходимлари Суат Т.ни кузатувга олди.

Тергов жараёнида Суат Т. марҳум Кадир Тунч (49 ёш) билан бирга 2025 йил 28 май куни Ўзбекистонга келгани маълум бўлди. Кадир Тунч ҳақида эса 3 июнь куни унинг қариндошлари томонидан йўқолганлик бўйича мурожаат қилингани аниқланди.

Тергов давомида 4 нафар гумонланувчи қўлга олинди. Улар орасида Суат Т. ҳам бор. Сўроқ жараёнида у содир этган жиноятини тан олган.

Унинг кўрсатмасига кўра, у ва Кадир Тунч Ўзбекистонда ресторан очишни режалаштирган. Суат Т. лойиҳа учун 20 минг АҚШ доллари берганини, келишув амалга ошмай қолгач, пулни қайтаришни талаб қилганини билдирган.

Суҳбат давомида автомобилда тортишув чиққан. Суат Т.нинг айтишича, жанжал муштлашувга айланган ва у ўзини йўқотиб қўйган ва Кадир Тунчни пичоқлаган. Бироз вақт ўтгач, Кадир Тунч қон йўқотиш оқибатида вафот этган.

Гумонланувчи жасадни йўлдан бироз ичкарироққа олиб кириб, чуқур қазий олмагани сабабли устига тупроқ тортганини айтган. Шундан сўнг улар Истанбулга қайтиб кетган.

Суат Т. ижарага олган автомобилни шахсан топширолмаганини, таниши орқали қайта юборганини ҳам билдирган. Унинг сўзларига кўра, мазкур шахс қотилликдан бехабар бўлган.

Ҳозирда 4 нафар гумонланувчига нисбатан тергов ҳаракатлари якунланиб, уларнинг жиноий иши судга оширилган.