ЎРҚ–1168-сон, 17 августдаги қонун билан тадбиркорлик фаолиятига оид айрим қонун ҳужжатларига ўзгартириш ва қўшимчалар киритилди.

«Тадбиркорлик фаолияти эркинлигининг кафолатлари тўғрисида»ги қонунга кўра, тадбиркорлар қонунчиликда белгиланган тартибда энергия манбаларига уланиш ва улардан фойдаланиш ҳуқуқига эга бўлади.

Шунингдек, тадбиркорларга янги мажбурият, талаб, тақиқ, жавобгарлик ёки бошқа чекловларни белгилайдиган норматив ҳужжат лойиҳалари тадбиркорлар ҳамда уларнинг бирлашмалари иштирокида муҳокама қилиниши белгиланди.

Тадбиркорлик субъекти фаолияти унинг аризаси асосида, назорат қилувчи органлар томонидан эса 10 иш кунидан ортиқ бўлмаган муддатга тўхтатиб турилиши мумкин.

Агар фаолиятни тўхтатиб туриш муддати 10 иш кунидан ортиқ бўлса, бу чора суд томонидан 6 ойдан кўп бўлмаган муддатга қўлланиши мумкин.

Қонун билан тадбиркорлик фаолиятини амалга ошириш учун норматив-ҳуқуқий ва норматив-техник ҳужжатларда белгиланган барча мажбурий талабларни давлат томонидан ягона реестрга киритиш механизми жорий этилмоқда. Мажбурий талаблар реестрига маълумотларни тегишли соҳалардаги ваколатли давлат органлари ва ташкилотлари киритади.

Адлия вазирлиги Мажбурий талаблар реестрининг оператори этиб белгиланмоқда. Бу орқали тадбиркорлар учун уларга қўйиладиган мажбурий талабларни ягона тизимдан кўриш имконияти яратилади.

Эътиборли жиҳатларидан бири, тадбиркорлик субъектлари реестрга киритилмаган талабларни бажармагани учун жавобгарликка тортилмайди.

Қонун расмий эълон қилинган кундан эътиборан уч ой ўтгач кучга киради.