Бизнес-омбудсман девони Халқ депутатлари Тошкент шаҳар кенгашининг 2026 йил 17 февралдаги «Дизайн-коди» тўғрисидаги қарорининг тадбиркорлик фаолиятига таъсирини ўрганиб чиқди.

Эслатиб ўтамиз, мазкур қарор билан Тошкент шаҳрида «Дизайн-коди» қоидаларини жорий этиш чора-тадбирлари белгиланган эди.

Ўрганиш натижасида ушбу ҳужжатнинг айрим бандлари амалдаги қонунчиликка зидлиги ва тадбиркорлик фаолиятига салбий таъсир кўрсатиши аниқланди. Шу муносабат билан Бизнес-омбудсман Кенгаш қарорини қайта кўриб чиқиш юзасидан тегишли хулоса киритди.

«Норматив-ҳуқуқий ҳужжатлар тўғрисида»ги Қонун талабларига кўра, тадбиркорлик фаолиятига таъсир этувчи лойиҳалар Бизнес-омбудсман билан мажбурий тартибда келишилиши шарт. Бироқ ушбу қарор Вакил билан келишилмасдан қабул қилинган.

Халқ депутатлари Тошкент шаҳар кенгашининг қарордаги асосий камчиликлар:

Реклама воситалари учун белгиланган «паст тўйинган» ёки «нейтрал» ранг каби тушунчаларнинг ҳуқуқий мезони очиб берилмаган.

Рангларни бир хиллаштириш талаби тадбиркорларнинг интеллектуал мулк (рўйхатдан ўтган бренд) ҳуқуқларига зарар етказиши мумкин. Шунингдек, тармоқли брендларнинг манфаатлари инобатга олинмаган.

Янги талабларга мослашиш учун берилган 3 ойлик муддат етарли эмас. Жараённи тадбиркорларга ортиқча юклама туғдирмасдан, босқичма-босқич амалга ошириш тартиби назарда тутилмаган.

Бизнес-омбудсман томонидан Халқ депутатлари Тошкент шаҳар кенгашига мазкур қарорнинг тадбиркорликка оид қисмларини қайта кўриб чиқиш, нормаларга ўзгартириш киритиш ва кучга кириш муддатини узайтириш бўйича расмий хулоса киритилди.

Шунингдек, Вакил девони ушбу жараённи тадбиркорлар манфаатларини инобатга олган ҳолда, бевосита Бизнес-омбудсман ходимлари иштирокида қайта ишлашни таклиф этди, дейилади расмий муносабатда.