Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил раҳбарининг шахсий қабулида Тошкент вилоятида рўйхатдан ўтган «K & E-T» МЧЖ вакили  мурожаат қилиб, барча ваколатли идоралардан тегишли рухсатномаларни олган бўлишига қарамасдан, кўп қаватли уй-жой қурилиши учун туман қурилиш бўлими томонидан рухсат берилмаётганини маълум қилди.

Мурожаат Бизнес Омбудсман девони томонидан ўрганилиб, жамият томонидан Ягона интерактив давлат хизматлари портали орқали тақдим этилган ариза туман архитектори томонидан асоссиз равишда рад этилгани аниқланди. Ўрганиш жараёнида рад этиш учун қонунчиликда назарда тутилган асослар мавжуд эмаслиги, шунингдек, маъмурий тартиб-таомиллар бузилгани маълум бўлди.

Аниқланган қонунбузилиш ҳолатлари юзасидан мутасадди мансабдор шахсга нисбатан белгиланган тартибда таъсир чоралари кўрилди ҳамда аризани қонунчилик талабларига мувофиқ қайта кўриб чиқиш юзасидан тегишли кўрсатмалар берилди.

Кўрилган чора-тадбирлар натижасида айни вақтда корхонага ўзига тегишли объектда қурилиш ишларини амалга ошириш учун рухсатнома расмийлаштириб берилиши таъминланди.

Бизнес Омбудсман институти тадбиркорлик субъектларининг ҳуқуқ ва қонуний манфаатларини ҳимоя қилиш, давлат органлари томонидан асоссиз қарорлар қабул қилинишига йўл қўймаслик ҳамда ишбилармонлик муҳитини яхшилашга қаратилган ишларни изчил давом эттиради.