Техник жиҳатдан тартибга солиш соҳасида назорат инспексиясининг Навоий вилоят бўлими томонидан вилоятда сотилаётган Россияда ишлаб чиқарилган “Сибрина” ҳамда Ўзбекистонда ишлаб чиқарилган “Energy Red” савдо белгили антифриз маҳсулотларидан назорат хариди ўтказилди. 

Шунингдек, инспекциянинг Тошкент шаҳар бўлими томонидан пойтахтдаги савдо тармоқларида сотилаётган  “Extended Life Energy Antifreeze (5 kg)” ва “SibTrol Antifreeze G-12" маҳсулотлари харид қилиниб, уларнинг синовдан ўтказилиши таъминланди. 

Аккредитацияланган лабораторияда ўтказилган таҳлил натижалари ушбу маҳсулотларнинг техник регламент талабларига жавоб бермаслигини кўрсатди. 

Тадқиқотлар шуни аниқладики, сифатсиз антифриз иссиқликни тўлиқ ўтказмайди. Бу эса двигателнинг ҳаддан ташқари қизиб кетишига, радиатор, насос, трубкалар ҳамда двигател блокидаги йўлларда занг ва носозликлар пайдо бўлишига олиб келади. 

Натижада автомобильнинг умумий ишлаш муддати кескин қисқаради ва жиддий техник зарарлар юзага келади. 

Шу сабабли, истеъмолчиларга антифриз харид қилишда маҳсулотнинг ёрлиғи, ишлаб чиқарувчи мамлакати, техник кўрсаткичлари ҳамда сертификатланганлигига алоҳида эътибор бериш қатъий тавсия этилади.