Олий Мажлис Қонунчилик палатасида ер участкаларига бўлган ҳуқуқларни тизимлаштиришга қаратилган қонун лойиҳаси иккинчи ўқишда қабул қилинди.

Қонун лойиҳасига кўра, қишлоқ хўжалигига мўлжалланган ерларни ижарага бериш муддати амалдаги 30 йилдан 49 йилгача узайтирилмоқда. Қишлоқ хўжалигига мўлжалланмаган ер участкаларини ижарага беришнинг энг кўп муддати ҳам 49 йил этиб белгиланиши назарда тутилган.

Шунингдек, чет эл фуқаролари, юридик шахслар, фуқаролиги бўлмаган шахслар ҳамда чет эл инвестициялари иштирокидаги корхоналарга қишлоқ хўжалиги ерларидан иккиламчи ижара ҳуқуқи асосида фойдаланиш тартиби белгиланмоқда.

Қонун лойиҳасида мудофаа аҳамиятига эга ерлар, чегара ҳудудлари, тарихий-маданий аҳамиятга эга ерлар ҳамда ўрмон фонди ерлари чет элликларга берилмаслиги қатъий белгиланган.

Бундан ташқари, ноқишлоқ хўжалиги ерларини ижарага бериш тартиби соддалаштирилиб, ерларни аукцион орқали ижарага олиш ва уларни қайта ижарага беришга рухсат этилиши назарда тутилмоқда. Шунингдек, якка тартибдаги уй-жойлар жойлашган ер участкалари ижара ҳуқуқи асосида берилиши мустаҳкамланмоқда.

Депутатлар таъкидлашича, мазкур қонун ер муносабатларида ҳуқуқий аниқликни таъминлаш, давлат назоратини кучайтириш, инвестициявий жозибадорликни ошириш ҳамда ер ресурсларидан самарали фойдаланишга хизмат қилади.