Смартфонлар, ноутбуклар ва шунга ўхшаш қурилмаларнинг экранларидан таралувчи кўк нур инсон юз териси қаришини тезлаштириб юборади. Бу оксидловчи стресс ва коллагеннинг парчаланиши билан боғлиқ.

«Кўк нур ултрабинафша нурдан чуқурроқ — дерма даражасигача кириб боради ва эркин радикаллар ҳосил бўлишини кучайтиради. Оқибатда оксидланиш стресси юзага келади, коллаген парчаланиши кучаяди ва терининг қариш жараёнлари тезлашади», — деди тиббиёт фанлари номзоди, дерматовенеролог, MARTINEX илмий раҳбари Наталья Михайлова.

Смартфонлар нафақат тўғридан-тўғри зарарли нурлар тарқатади, балки микроциркуляциянинг бузилишига, юз мушакларининг зўриқишига (кўпроқ кўз атрофида), терининг сувсизланишига олиб келади. Шу билан бирга, қурилмадан чиқаётган иссиқлик ва қўлларнинг юзга доим тегиши терини ифлослайди, жумладан, себум (ёғ), чанг микрозаррачалари тўпланишига олиб келади.

Электрон қурилмаларнинг терига зарарини камайтириш учун, дерматолог кўк нурни пасайтирувчи ҳимоя экранларидан фойдаланишни, шунингдек, юзни доим тоза тутиш ва антиоксидантлар билан парваришлашни маслаҳат берди. Буларга, хусусан, C ва E витаминлари, биофлавоноидларни ўз ичига олган ўсимлик экстрактлари ва кўк чой киради.

Ҳатто хонада ҳам қуёшдан ҳимояловчи кремдан фойдаланиш мумкин, у экранларнинг кўк нуридан ҳимоя қилади. Албатта, соғлом турмуш тарзи — тўлақонли овқатланиш ва уйқунинг ҳам тери соғломлигида роли катта, дея хулоса қилди мутахассис.