АҚШ маъмурияти Венесуэла президенти Николас Мадурога қарши босимни кучайтириш мақсадида мамлакат пойтахти Каракас устидан варақа сочмоқчи, деб хабар берди CBS News.

АҚШ психологик урушнинг ушбу усулидан 2003 йилда Ироққа бостириб кириш арафасида ҳам фойдаланган эди. 

Варақада Николас Мадурони ҳибсга олишга ёрдам берувчи маълумот учун кўп миллион долларлик мукофот берилиши қайд этилади.

Куни кеча Reuters ҳам АҚШ Венесуэла билан боғлиқ амалиётларнинг янги босқичини бошлашга ҳозирлик кўраётгани ҳақида хабар берганди.

Ахборот агентлиги махфийлик важидан янги амалиётнинг аниқ муддати ва кўламини аниқлашга муваффақ бўлмаган. Аммо Доналд Трамп маъмуриятининг юқори мартабали вакили президент Николас Мадурога қарши ҳар қандай вариант қўлланишини истисно этмаган.

«Президент Трамп мамлакатимизга наркотиклар оқимини тўхтатиш ва айбдорларни жавобгарликка тортиш учун Америка қудратининг барча унсурларини қўллашга тайёр», — деган Оқ уй вакили.

Вашингтон мулозимлари муҳокама этаётган вариантлар орасида Мадурони ҳокимиятдан ағдариш режаси ҳам бор.

Axios нашри Оқ уйдаги манбаларига асосланиб тарқатган сўнгги хабарларга қараганда эса, АҚШ Венесуэла президентини террорчи ташкилот бошлиғи деб тан олганига қарамай, Трамп Мадуро билан бевосита мулоқот қилишни режалаштирмоқда. Агар бу хабар тасдиқланса, Венесуэлага ҳарбий ҳужум эҳтимоли камаяди. 

Трамп маъмурияти Венесуэла раҳбарини АҚШга ноқонуний равишда гиёҳвандлик моддаларини етказишда айбламоқда. Мадуронинг ўзи наркосавдога алоқадорлик айбини рад этмоқда.

Венесуэлани 2013 йилдан буён бошқариб келаётган Николас Мадуро 2024 йил июль ойида президентлик сайловида ғалаба қозонганини эълон қилгач, халқаро ҳамжамият норозилигига нишон бўлган. У сайлов натижаларини сохталаштиришда айбланган.  

АҚШ жорий йил бошида Мадурони қўлга олганлик учун 25 миллион доллар мукофот пули эълон қилган эди.

Сўнгги ойларда Қўшма Штатлар Мадуро маъмуриятига қарши босимларни кучайтирмоқда.

Сентябрь ойидан буён Пентагон Венесуэлага тегишли кемаларга 21 марта авиаҳужум уюштирган. Оқибатида камида 80 киши ҳалок бўлган. АҚШ мудофаа вазири Пит Ҳегсет авиаҳужумлар наркосавдогарлар ва картелларга қаратилганини маълум қилган. Аммо бу борада аниқ далил тақдим этилмаган.

Бу орада Венесуэла мамлакат мудофаа қобилиятини ошириш ва ҳаво ҳудудини эҳтимолий ташқи тажовуздан ҳимоя қилиш мақсадида кенг кўламли ҳарбий машқлар ўтказган.

Мадуро ҳарбий ёрдам сўраб Россия, Хитой ва Эронга мурожаат йўллаган.

Аввалроқ президент Трамп АҚШ Марказий разведка бошқармасига Венесуэла ҳудудида яширин операциялар ўтказиш учун рухсат берганини маълум қилганди.

Ҳозирда минтақада 15 мингга яқин америка ҳарбийси мавжуд. Атлантика океанининг ғарбий қисмида АҚШнинг тўртта ҳарбий кемаси, жумладан, «USS Gerald R. Ford» деб номланган энг замонавий авиаташувчи ҳаракатланмоқда. Кариб денгизида ҳам яна еттита ҳарбий кема шай ҳолатда экани айтилмоқда.

Ўтган ҳафта АҚШ Федерал авиация бошқармаси йирик авиакомпанияларни Венесуэла узра парвозларда эҳтимолий хавфли ҳолатлардан огоҳлантирган ва эҳтиёткорликка чақирган эди.