Жорий йил 9 ноябр куни АҚШ Ички хавфсизлик департаменти (DHS) Канзас штатида 31 ёшли Ахрор Бозоровни қўлга олгани ҳақида маълум қилди. У – Ўзбекистонда террорчилик ташкилотига аъзоликда айбланган ва халқаро қидирувда бўлган.

Маълумотларга кўра, Ўзбекистон ҳуқуқни муҳофаза қилиш органлари 2022 йилда Бозоровга нисбатан террорчилик ташкилоти таркибида бўлгани, интернетда жиҳодга даъват қилувчи материаллар тарқатгани ва радикал гуруҳларга аъзолар ёллагани учун қидирув эълон қилган.

АҚШ Миграция ва божхона қўмитаси (ICE) маълумотига кўра, Бозоров Канзасда 18 ғилдиракли юк машинаси ҳайдовчиси сифатида ишлаб юрган пайтда қўлга олинган.

Шу билан бирга, унинг 2023 йил февралда АҚШга қонуний бўлмаган тарзда киргани ва чегарада ушланганидан сўнг, Байден маъмурияти томонидан мамлакат ичига қўйиб юборилгани айтилади.

Бозоров 2024 йил январда ишлашга рухсатнома олган ва Пенсильвания штати ҳокими Джош Шапиро маъмурияти унга коммерциявий ҳайдовчилик гувоҳномаси (CDL) берган.

DHS ёрдамчиси Триша Маклафлин Оқ уй сиёсатини кескин танқид қилиб, террорда айбланаётганларнинг Америка йўлларида юк машина ҳайдамаслиги кераклигини таъкидлайди.

ICE маълумотига кўра, ҳозирда Ўзбекистон томони Бозоровнинг экстрадиция қилинишини қидирув ордерига мувофиқ талаб қилиши мумкин.