Бир муддат олдин Солиқ қўмитаси тизимидаги ташкилотлардан бири «Янги технологиялар илмий ахборот маркази» АЖнинг тендер орқали 17 миллиард сўмга электрон таржимон сотиб олаётганига доир хабарлар тарқалган эди.

Қўмита мазкур хабарларга расмий муносабат билдириб, давлат харидлари тизимидаги 17 млрд сўмлик «электрон таржимон» техник хато натижаси эканини билдирди.

Қайд этилишича, гап таржимон сотиб олиш ҳақида эмас, балки имло текшириш ва матнларни турли алифболарга ўгириш имконини берувчи сунъий интеллектга асосланган махсус модулни жорий этиш ва унга техник хизмат кўрсатиш ҳақида бормоқда. Ушбу технология солиқ хизмати электрон ҳужжат айланиши тизимига интеграция қилинган.

Хизмат нархи бир транзакция учун 17 сўмни ташкил этади. Давлат харидлари тизимига маълумот киритишда техник хатога йўл қўйилган: 100 миллион транзакция ўрнига хатолик сабаб 1 миллиард транзакция кўрсатилган. Натижада, умумий сумма 1,7 млрд сўм ўрнига 17 млрд сўм тарзида акс этган.

Мазкур хато ғазначилик назорати босқичида автоматик тарзда аниқланиб, тизим томонидан блокланган. Шу сабабли ушбу операция тасдиқлаш жараёнидан ўтмаган ва савдоларга қўйилмаган.

Ҳозирда мазкур лот биржа савдоларидан олиб ташланган.