Бош прокуратура ҳузуридаги Департамент томонидан ўтказилган назорат тадбирлари давомида республиканинг қатор ҳудудларида электр энергиясидан ноқонуний фойдаланиш ҳолатлари фош этилди. Қоидабузарлар томонидан етказилган умумий зарар 4,1 млрд сўмдан ошди.

​Хусусан, энг йирик талон-торожлик ҳолатлари қуйидагича:

​Сирдарё туманида «D.I.» фермер хўжалиги масъуллари ҳудуддаги сув насосларининг электр ҳисоблагичига ташқи таъсир кўрсатиш орқали 1,7 млрд сўмлик энергияни ўғирлаган.

​Ўртачирчиқ туманида «R.A.» хусусий корхонаси сув насосини электр тармоғига ўзбошимчалик билан улаб, давлатга 1,1 млрд сўмлик зарар етказган.

​Шунингдек, ҳуқуқни муҳофаза қилувчи органлар томонидан қуйидаги ҳудудларда ҳам ноқонуний уланиш ҳолатлари аниқланган:

​Асака туманида ЯТТ «S.R.» савдо дўконида — 319,7 млн сўм;

​Андижон туманида фуқаро А.З. умумий овқатланиш шохобчасида — 300,1 млн сўм;

​Янгийўл туманида «O.R.» МЧЖ раҳбари сув насосини тармоққа тўғридан-тўғри улаб — 299,9 млн сўм;

​Олмазор туманида «M.T.» МЧЖ биносидаги электр ҳисоблагичга ташқи таъсир кўрсатиб — 278,6 млн сўм;

​Термиз туманида ЯТТ «K.O.» савдо дўконида — 119,7 млн сўм;

​Зомин туманида фуқаро Т.Ш. ўз хонадонида — 115,5 млн сўм.

​Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилди. Ҳозирда тергов ҳаракатлари давом этмоқда.