Ўт очишни тўхтатиш келишуви кучга киргандан сўнг Исроил ҳарбий ҳаракатлари натижасида Ғазо секторида камида 51 киши ҳалок бўлди. Бу ҳақда Ал Жазира тиббиёт ходимларига таяниб хабар берди. 

Телеканал манбаларига кўра, анклавдаги яна 150 киши жароҳат олган. 

Исроил мудофаа кучлари Фаластиннинг ҲАМАС ҳаракати 19 октябр куни Ғазо жанубидаги Рафаҳ ҳудудида қўшинларга ҳужум қилганини маълум қилди. Исроил ҳаракатни ўт очишни тўхтатиш келишувини бузганликда айблаб, жавоб зарбаларини берди. 

Исроил Мудофаа вазири Исроил Кац армияга “Ғазо секторидаги Хамас террорчилик нишонларига қарши қатъий ҳаракат қилиш”ни буюрганини айтди. Фаластин ҳаракати Рафаҳ ҳодисасига алоқадорлигини рад этиб, ўт очишни тўхтатиш келишувини бузмаганини билдирди. 

Исроил ва ХАМАС ўртасидаги тинчлик келишуви 10 октябрдан кучга кирди.Иккала томон бир неча бор бир-бирини сулҳни бузганликда айблаб келади. Қўшма Штатлар ҲАМАСнинг ҳаракатлари туфайли тинчлик келишувларига таҳдид солиши ҳақида огоҳлантирган, бироқ Фаластин ҳаракати айбловларни рад этган.