Ҳожилар Байтуллоҳ ёпинчиғи – Каъбапўш тайёрланиш жараёнлари билан танишди (фоторепортаж)
Турли давлатлардан чақирилган ҳожилар, жумладан ўзбекистонлик ҳожилар ҳам Муқаддас Каъба устига ёпиладиган ёпинчиқ – кисва (ёки Каъбапўш)нинг тайёрланиш жараёнлари билан таништирилди.
Каъбапўш Байтуллоҳга кўрсатиладиган эътиборнинг алоҳида кўринишларидан бири саналади.
Каъба ёпинчиғининг баландлиги 14 метрга етади. Унинг юқори қисмида эни 95 см, узунлиги 47 м бўлган матода Қуръон оятлари ёзилган. Мато 16 қисмга ажратилган. Уларнинг ҳар бири турли исломий нақшлари билан безатилган.
У матонинг қуйи қисми эса Қуръон оятлари билан тўлдирилган. Оятлар орасидаги бўш жойларга эса “Йа Ҳайй” (Эй, Тирик зот!), “Йа Қайюм” (Эй, Барча жойда мавжуд зот), “Йа Раҳим” (Эй Меҳрибон зот), “Йа Раҳмон” (Эй Раҳмли зот), “Ал-ҳамдулиллаҳ ул-Раббийл аламийн” (Бутун оламларнинг Эгаси Аллоҳга ҳамд-санолар бўлсин) калималари туширилган.
Макка шаҳрида Каъба ёпинчиғи – кисванинг кўргазмасини ташкил қилиш анъанага айланган. Унда кисвани тайёрлашда ишлатиладиган ускуналар, мато ва ипак маҳсулотлари намойиш этилади.
Каъба ёпинчиғини тайёрлаш учун Саудия Арабистони ҳукумати 1927 йилда алоҳида устахона ташкил қилган. Устахонада 240 ҳунарманд ва техник мутахассислар меҳнат қилади. Ҳозирги кунга келиб кисва тайёрлашга 17 миллион саудия риёли (тахминан 4,5 миллион доллар) сарфланади.
Кисванинг олтин иплар билан нақшлар солиб тикиладиган матосининг ўзига 450 кг.дан зиёд ипак ишлатилади. Ҳар йили иккита кисва тайёрланади. Бири Каъбанинг устига ёпилса, иккинчиси, ҳар эҳтимолга қарши сақлаб қўйилади.
Изоҳ қолдириш учун сайтда рўйхатдан ўтинг
Кириш
Ижтимоий тармоқлар орқали киринг
FacebookTwitter