Тошкент халқаро аэропортида 11,8 килограмм гашиш мойининг ноқонуний олиб кирилишига чек қўйилди. Бу ҳақда Давлат хавфсизлик хизмати хабар қилди.

ДХХ ходимлари «Тошкент-Аэро» ихтисослаштирилган божхона комплекси билан ҳамкорликда ўтказган тезкор тадбирлар давомида «Бангкок – Деҳли – Тошкент» авиақатнови орқали келган 2005 йилда туғилган Қирғизистон фуқаросининг юки текширилган.

Текширув чоғида жомадондаги шампун идишлари ичига яширилган, умумий оғирлиги 11,8 килограмм бўлган гашиш мойи аниқланган.

Шундан сўнг ўтказилган тезкор тадбир давомида мазкур наркотик моддани қабул қилиб олиш учун Юнусобод туманидаги хонадонга келган, Чирчиқ шаҳрида яшовчи 2001 йилда туғилган шахс ҳам ушланган.

Дастлабки маълумотларга кўра, гиёҳвандлик воситаси Таиланддан Ўзбекистон орқали қўшни давлатга транзит тарзда олиб ўтилиши режалаштирилган.

Мазкур ҳолат юзасидан Жиноят кодексининг 246-моддаси 2-қисми (контрабанда) билан жиноят иши қўзғатилган. Гумонланувчиларга нисбатан қамоқ эҳтиёт чораси қўлланилган. Тергов ҳаракатлари давом этмоқда.