Бир муддат олдин Туркияда қабул қилинган янги қарор тўғрисида турли талқинда ахборот тарқатилди. Бир нечта ОАВ ва телеграм-каналлар ушбу маълумотни «Туркия туркий давлатлар фуқароларига ишга жойлашишни енгиллаштирди», мазмунида кенг сарлавҳалар билан эълон қилди, жумладан, «Xabar.uz» ҳам.

Турк тилидаги ҳужжатда келтирилган жумлалар бироз нотўғри талқин қилингани сабабли тарқатилган юқоридаги маълумотлар аслида «келиб чиқиши турк бўлган хорижликларга/туркча сўзлашувчи чет элликлар»га (foreigners of Turkic origin / Turkic-speaking foreigners) тегишли эканиги аниқлик киритилди (айни пайтда «Xabar.uz»да ҳам маълумот аслига мосланган).

Юқоридаги хатолик бир қатор минтақавий ва рус тилли сайтлар томонидан йўл қўйилган бўлиб, уларда Туркия туркий давлатлар фуқароларининг ишга жойлашишини енгиллаштиргани ёки уларга нисбатан аввалги «чет эллик» мақомини олиб ташлагани ҳақида ёзилган. Масалан, 24.kg, Newdosh / ReOpen.Media ва Orda.kz сайтлари «citizens of Turkic states» (туркий давлатлар фуқаролари) деган сарлавҳа билан хабар тарқатган.

Бироқ Report.az, Tengrinews, trtrussian ва бошқа айрим нашрлар, ўз вақтида аввалги хабарларини таҳрирлаб қўйди ва Туркиядаги янги тартиб – келиб чиқиши турк бўлган/турк тилли хорижликларга тегишли эканини қайд этишди.