Turkimaniston prezidenti 15—16 noyabr kunlari Markaziy Osiyo davlatlari rahbarlarining maslahat uchrashuvida ishtirok etish uchun O‘zbekistonga tashrif buyuradi.

Turkmaniston prezidenti Sardor Berdimuhamedovning O‘zbekistonga tashrifi chog‘ida ikki davlat chegarasida qo‘shma savdo markazi ochiladi, deb xabar berdi Turkmanistonning “Neytral Turkmaniston” rasmiy gazetasi.

“Markaziy Osiyo davlatlari rahbarlarining Toshkentda bo‘lib o‘tadigan yettinchi maslahat uchrashuvi kun tartibi davlatlararo sheriklikning keng ko‘lamli yo‘nalishlarini, jumladan, mintaqada konstruktiv hamkorlikni yanada mustahkamlash, dolzarb mintaqaviy va xalqaro muammolar yuzasidan fikr almashishni o‘z ichiga oladi.

Bundan tashqari, sammit doirasida mintaqaviy hamkorlikni kengaytirishga qaratilgan qator yonma-yon tadbirlar ham tashkil etiladi. Oliy darajadagi muzokaralar va boshqa tegishli tadbirlar, yangi Turkmaniston-O‘zbekiston chegara savdo markazining ochilishi rejalashtirilgan”, — deyiladi xabarda.

Eslatib o‘tamiz, 2022 yilning oktyabr oyida Shovot (O‘zbekistonning Xorazm viloyati) va Dashoguz (Turkmanistonning Toshhovuz viloyati) chegara o‘tkazish punktlari hududida chegara savdo zonasi qurilishi boshlangan edi. Bu yerda zamonaviy infratuzilma, jumladan, savdo pavilonlari, omborxonalar, konteynerlar saqlash joylari, tadbirkorlar uchun ish joylari barpo etish rejalashtirilgan.