Eron AQSh bilan muzokaralarning ikkinchi bosqichiga o‘tishdan oldin Vashington «ishonchni tiklashga qaratilgan besh shart»ni bajarishi lozimligini bildirdi. Bu haqda Fars agentligi xabardor manbaga tayanib xabar qildi.

Nashr ma’lumotiga ko‘ra, aynan shu talablar Tehron tomonidan Vashingtonga AQShning 14 banddan iborat tinchlik rejasiga javob sifatida yuborilgan.

Fars manbasiga ko‘ra, Eron quyidagi shartlar bajarilmas ekan, AQSh bilan yangi muzokara bosqichini boshlamaydi:

• barcha frontlarda, jumladan Livanda urushni to‘xtatish;
• Eronga qarshi sanksiyalarni bekor qilish;
• muzlatilgan eron aktivlarini ochish;
• urush natijasida yetkazilgan zarar uchun kompensatsiya to‘lash;
• Ho‘rmuz bo‘g‘ozi ustidan Eron suverenitetini tan olish.

Manbaning ta’kidlashicha, ushbu talablar tomonlar o‘rtasida «minimal ishonch muhitini shakllantirish» uchun zarur deb hisoblanmoqda.

Fars’ning yozishicha, Eron pokistonlik vositachilar orqali hamon dengiz blokadasi saqlanib qolayotgani Tehronda Vashingtonga nisbatan ishonchsizlikni yanada kuchaytirganini yetkazgan.

Shuningdek, Eron AQShning 14 bandli taklifini «to‘liq bir tomonlama» deb baholab, u mamlakat manfaatlariga javob bermasligini aytgan.

Eslatib o‘tamiz, aprel oyidan beri AQSh va Eron o‘rtasida sulh amal qilib kelmoqda. Tomonlar mojaroni hal qilish bo‘yicha o‘zaro takliflar almashgan bo‘lsa-da, muzokaralar hozircha bosim nuqtasiga kelib qolgan.

10 may kuni AQSh prezidenti Donald Tramp Tehronning tinchlik rejasini «qabul qilib bo‘lmaydigan» hujjat deb atagan edi.

Axios nashri manbalari esa Tramp maslahatchilari bilan harbiy harakatlarni qayta boshlash ehtimolini muhokama qilishi mumkinligini xabar qilgan.

Eron tomoni esa yangi hujumlar boshlansa, uranni 90 foizgacha boyitishga o‘tishini istisno qilmagan.