Rossiyaning "Proyekt" nashri prezident Vladimir Putin davlat xizmatini oilaviy biznesga aylantirganini iddao qilib chiqdi.

Maqolada prezident qarindoshlarining butun tarmog‘i Rossiya iqtisodiyoti va hukumatining asosiy sohalarida, vazirliklardan tortib yirik davlat kompaniyalarigacha o‘zini namoyon qilgani ta’kidlangan. 

"Proyekt" Putin hokimiyat tepasidagi yillarida kamida 24 nafar qarindoshi va yaqin sheriklariga - qizlaridan tortib, taxmin qilingan xushtorlari va ularning oilalarigacha - davlat idoralari bilan bog‘liq nufuzli lavozimlarni egallashga yordam berganini aniqladi. 

"Ishga qabul qilinganlar" orasida prezidentning qizlari Mariya Voronsova va Katerina Tixonovaning oilalari, amakivachchalari Yevgeniy va Igor Putin hamda amakivachchalari Lyubov Shelomova va Lyubov Kruglova bor. Tergov ma’lumotlariga ko‘ra, ularning barchasi davlat tuzilmalari bilan bevosita bog‘liq daromad va lavozimlar olgan. 

Bundan tashqari, ommaviy axborot vositalari tomonidan ilgari Vladimir Putin bilan bog‘langan to‘rt ayolning qarindoshlari - uning sobiq rafiqasi Lyudmila Ocheretnaya, gimnastikachi Alina Kabayeva, ishbilarmon ayol Svetlana Krivonogix va teleboshlovchi Alisa Xarcheva - davlat xizmatida va yirik davlat kompaniyalarida ish topdilar. 

Eng nufuzli lavozimlar davlat rahbarining amakivachchasi Yevgeniy Putinning oilasiga nasib etdi. Uning qizi, prezidentning jiyani Anna Sivileva hozirda mudofaa vazirining o‘rinbosari, eri Sergey Sivilev esa Rossiya energetika vaziri. Annaning ukasi Mixail Putin "Gazprom"da yuqori lavozimni egallagan. 

"Proyekt"ning hisob-kitoblariga ko‘ra, Putin barcha Rossiya hukmdorlari orasida oilaviy qarindoshchilik miqyosi bo‘yicha rekordchi bo‘lib, bu Romanovlar davridan boshlangan. Taqqoslash uchun, uzoq vaqtdan beri kadrlar tanlashda "jinoiy" yondashuvning ramzi hisoblangan Boris Yelsin asosiy lavozimlarga beshtadan ortiq qarindoshini qo‘ymagan.