Barchamizga ma’lumki, til bilmaslik muammosi chet elga sayohat qilganda yoki xorijliklar bilan muloqot qilishda eng asosiy to‘siqlardan biri bo‘lib kelgan. Biroq zamonaviy texnologiyalar bu chegaralarni tezlik bilan yo‘q qilmoqda. “Android Authority” nashrining xabar berishicha, “Google Tarjimon” ilovasining Android uchun mo‘ljallangan yangi versiyasida foydalanuvchilar uzoq kutgan “Jonli tarjima” rejimi uchun maxsus vidjet aniqlandi.

Hozircha mazkur funksiya ommaviy foydalanishga chiqarilmagan bo‘lsa-da, nashr mutaxassislari uning kodini faollashtirib, amalda sinab ko‘rishga muvaffaq bo‘lishdi. Yangi vidjetning asosiy afzalligi uning ekstremal tezkorligi va foydalanish qulayligidadir.

Tarjimani faollashtirish uchun endi har safar ilovani ochib, kerakli bo‘limlarni qidirib o‘tirish shart emas. Barchasi asosiy yekrandagi bitta tugma orqali ishga tushadi. Yangi interfeys foydalanuvchilarga muloqot jarayonini o‘z ehtiyojlariga moslashtirish uchun bir qator qulay sozlamalarni taqdim etadi:

• Ekrandagi yagona bosish orqali tarjima rejimi darhol faollashadi va suhbatga tayyor holatga keladi;
• Vidjet interfeysining o‘zidayoq tillarni o‘zgartirish imkoniyati mavjud;
• Tarjima qilingan ovoz qayerdan, ya’ni quloqchindan yoki telefon dinamigidan chiqishini o‘zingiz tanlaysiz.

Ushbu yangilik ayniqsa turizm bilan faol shug‘ullanuvchilar, xizmat safarlariga tez-tez chiqadiganlar va chet ellik hamkorlar bilan ishlaydigan mutaxassislar uchun haqiqiy qulaylik yaratadi. Muloqotni maksimal darajada tabiiy va uzluksiz qilishga qaratilgan bu yangilik Google kompaniyasining kundalik jarayonlarni soddalashtirishga qaratilgan navbatdagi muhim qadami hisoblanadi.