Трамп маъмуриятининг Венесуэладаги хатти-ҳаракатлари ҳамда Гренландияга иштаҳаси тобора карнай бўлиб бораётгани Канаданинг тинчини бузган, деб ёзмоқда Bloomberg.

Мадуронинг ўғирланиши ва Гренландия «босиб олиниши» ҳақидаги баёнотлардан сўнг, Вашингтон шимолдаги қўшнисига ҳам куч ишлатиши мумкин, оҳангидаги хавотирлар охирги пайтларда Оттавани ларзага келтирмоқда.

Қўрқув шунчаликки, The Beaverton сатирик нашри ўз мақоласини ушбу сарлавҳа билан чоп этди: «Марк Карни телефонидаги геолокацияни ўчириб қўйди, ҳар эҳтимолга қарши». (Марк Карни — Канада бош вазири — таҳр.).

Гарчи таҳлилчилар тўғридан-тўғри ҳарбий босқин эҳтимоли жуда озлигини уқтиришаётган бўлса-да, Канаданинг заиф жиҳатлари кафтдагидек намоён. Ҳудудининг катталиги бўйича жаҳондаги иккинчи ўринда турувчи мамлакатнинг мунтазам ва захира қўшинлари сони 100 000 кишидан кам. Иқтисодиёти ўта АҚШга боғланган: экспортининг деярли 70 фоизи жанубга, яъни штатларга кетади, яқинда қайта кўриб чиқилажак амалдаги USMCA савдо битими эса Канадага бўғзига тутилган пичоқ мисоли хавф солмоқда. Битим бекор қилиниши ёки 35 фоизлик бож тарифлари ишга тушиши Канада иқтисодиётини фалаж қилиб қўйиши мумкин.

АҚШ шимолдаги қўшнисининг ички ишларга аралашиши эҳтимоли қўшимча таҳдидларни туғдиради. Нефт қазиб олувчи, шунинг баробарида айирмачилик кайфиятидагилар кучли Алберта провинциясида фаоллар АҚШ давлат департаменти билан алоқалар ҳақида жар солишни бошлаб юборишган. Канада жамиятини дарз кетказиш учун «кулранг пуллар» ва ёлғон ахборот тарқатиш кампанияларидан фойдаланиш бўйича сценарийлар мавжудлиги эҳтимолини экспертлар инкор этишмаяпти.