AQSh Kongressidagi demokratlar agar prezident Donald Tramp Kongress roziligisiz Eronda harbiy operatsiyalarni davom ettirsa, unga qarshi sudga da’vo arizasi berishni ko‘rib chiqmoqdalar.

Bu haqda Time jurnali manbalarga tayanib xabar berdi. Kongress tomonidan operatsiyani tasdiqlash uchun qonun bilan belgilangan 60 kunlik muddat 1-mayda tugaydi. 

Bir nechta manbalar nashrga agar prezident qonunni e’tiborsiz qoldirsa, Kongress sudga da’vo arizasi berish uchun ishonchli huquqiy asoslarga ega bo‘lishini aytishdi. Ularning aytishicha, bu imkoniyat haqidagi muhokamalar hali dastlabki bosqichda, ammo kelgusi haftalarda kuchayishi mumkin.

Biroq, aksariyat manbalar sudga da’vo arizasi berishdan oldin parlament choralarini qo‘llash zarurligini ta’kidlaydilar. 

Nashr ta’kidlaganidek, federal sudlar ko‘pincha Kongress va prezidentlar o‘rtasidagi harbiy kuch ishlatish bo‘yicha kelishmovchiliklarni hal qilishdan bosh tortgan. Ularning qarorlarida bunday nizolar «siyosiy» deb topilgan va saylangan organlar tomonidan hal qilinishi kerak. Shu asosda sudlar 2002-yilda Iroqqa bostirib kirish va 2011-yilda Liviyadagi harbiy operatsiyaga qarshi da’vo arizalarini rad etdi. Biroq, bu safar Kongress sudga da’vo arizasi uchun yanada ishonchli asoslarga ega bo‘ladi, deb xabar berdi manba Time nashriga. 

1973-yilgi Urush vakolatlari qonuniga ko‘ra, agar Kongress kuch ishlatishga ruxsat beruvchi rezolyusiya qabul qilmasa, prezident 60 kundan keyin harbiy operatsiyalarni tugatishi kerak. Qonunda agar davlat rahbari qo‘shinlarni olib chiqish uchun qo‘shimcha vaqt kerakligini tasdiqlasa, bir martalik 30 kunlik muddatga uzaytirish mumkin.

Eron bilan mojaro boshlanganidan beri o‘tgan haftalarda Kongress na harbiy harakatlarni tugatish to‘g‘risidagi rezolyusiyani, na ularga rasmiy ruxsatnomani qabul qila olmadi.