Сурия президенти Аҳмад аш-Шараа Исроил билан янги хавфсизлик келишуви тузиш ташаббуси билан чиқди. Унга кўра, Исроил 1974 йилги келишувда белгиланган ажратиш чизиғига қайтиши керак.

Туркияда ўтган Анталия дипломатия форумида сўзга чиққан президентнинг таъкидлашича, бу жараён босқичма-босқич амалга оширилиши мумкин.

«Биз музокараларнинг биринчи босқичига кирмоқдамиз. У хавфсизлик келишувини ўз ичига олади ва Исроилнинг 1974 йилги чегараларга қайтишини кафолатлаши керак», – деди у.

Шараанинг сўзларига кўра, агар ушбу босқич муваффақиятли ўтса, кейинчалик Голан тепаликлари масаласини ҳал қилишга қаратилган узоқ муддатли музокаралар бошланиши мумкин.

Шу билан бирга, Сурия томони Исроилнинг Голан устидан суверенитетини тан олишни қатъий рад этди.

Маълумот учун, 1974 йилда Сурия ва Исроил ўртасида тузилган келишув икки томон ўртасидаги тўқнашувларни чеклашга хизмат қилган эди. Бироқ 2024 йил декабрида Асад режими қулаганидан сўнг, Исроил ушбу келишув амал қилмаслигини эълон қилиб, чегарадаги буфер ҳудудни эгаллаган.

Шунга қарамасдан, Суриядаги янги ҳукумат Исроилга қарши таҳдидлар билдирмаган. Бироқ Исроил томонидан мамлакат ҳудудига ҳаво зарбалари давом этаётгани қайд этилмоқда.

Сурия Исроил билан янги хавфсизлик келишуви тузишни таклиф қилди. Дамашқ 1974 йилги чегараларга қайтишни талаб қилмоқда.