АҚШнинг собиқ миллий хавфсизлик бўйича маслаҳатчиси Жон Болтон Венесуэла мухолифати етакчиси ва Нобел тинчлик мукофоти лауреати Мария Корина Мачадога ўз мукофотини Дональд Трампга беришни тавсия қилди. У бу ҳақда видеоинтервьюда айтди, интервьюдан парча Clash Report томонидан эълон қилинди.

Болтоннинг айтишича, бундай қадам Мачадо учун сиёсий жиҳатдан фойдали бўлиши мумкин.

«Менинг маслаҳатим шу бўларди: олган Нобел тинчлик мукофотингиз медалини Дональд Трампга беринг. Нобел фонди сиз учун бошқа медаль тайёрлаб бериши мумкин. Акс ҳолда, унинг нима қилишини ўзингиз биласиз», – деди Болтон.

У сўзларини АҚШнинг собиқ президенти Теодор Рузвельт мисоли билан изоҳлаган. Рузвельт Россия ва Япония ўртасидаги урушда воситачилик қилгани учун Нобел мукофотига сазовор бўлган ва унинг медали ҳозиргача Оқ уйда сақланади. Болтон ҳазил тариқасида Трамп уни девордан олиб, ўзиники қилиб олишидан хавотирда эканини айтади.

Аввалроқ Мария Корина Мачадо ўзи ҳам Нобел тинчлик мукофотини Трампга беришга тайёр эканини билдирган эди. У 3 январни «адолат зулм устидан ғалаба қилган кун» деб атаган. Мачадо мукофотни олиш учун Норвегияга борган ва ҳозирча Венесуэлага қайтмаган, аммо яқин орада қайтиш нияти борлигини айтган.

Жон Болтон 2018–2019 йилларда Дональд Трамп маъмуриятида миллий хавфсизлик бўйича маслаҳатчи бўлиб ишлаган. У 2019 йилда президент билан келишмовчиликлар сабаб лавозимидан бўшатилган. 2025 йил август ойида эса ФБР унинг уйида махфий ҳужжатлар ва мемуарлари билан боғлиқ тергов доирасида тинтув ўтказган.