Жорий йил 5-9 май кунлари Москвада мобил интернет ва СМС юбориш хизмати чекланади. Уяли алоқа операторлари бу ҳолатни Ғалаба байрами кунларида хавфсизликни таъминлаш зарурати билан изоҳлаган. 

Байрам кунларида «оқ рўйхат»га киритилган ва одатда чекланмайдиган ресурслар фаолиятига ҳам тақиқ қўйилиши кутилмоқда. Чеклов чоралари нафақат пойтахт маркази, шунингдек, Москва автомобиль ҳалқа йўли ҳудудида амал қилади.

Аввалроқ Украина президенти Владимир Зеленский Москвада Ғалаба байрами муносабати билан кучайтирилган чора-тадбирларга муносабат билдирган ва украин дронлари Россия пойтахтига етиб боришидан огоҳлантирган эди.

«Россия 9 май куни парад ўтказишини эълон қилди, лекин бу йил парадда ҳарбий техника қатнашмайди. Бу гап рост бўлса, кўп йиллардан бери илк марта улар парадда қуролларини намойиш этишга журъат қила олишмайди. Парадга украин дронлари ҳам учиб бориши мумкин. Бу ҳол улар аввалгидек кучли эмаслигини кўрсатади», – деган эди Зеленский.

Россия 9 май – Ғалаба кунини нафақат урушда қозонилган зафар, балки замонавий геосиёсий мақсад ва мўлжалларининг намойиши сифатида алоҳида тартибда нишонлаб келади.

Аммо анъанавий парад бу гал узоқ йиллардан буён илк бор ҳарбий техникасиз ўтказилади. Россия мудофаа вазирлиги буни «оператив ҳолат» билан изоҳлаган. Кремль эса «террорчилик таҳдиди» ҳақида гапирган.

Нижний Новгород, Саратов, Чувашистон, Калуга каби ҳудудларда ҳарбий парад бекор қилинган. Санкт-Петербургда эса Ғалаба куни ихчамроқ тарзда байрам қилинади.

Апрель ойи охирида Россия президенти Владимир Путин америкалик ҳамкасби Дональд Трамп билан суҳбатда 9 май куни Украина билан сулҳ эълон қилишга тайёрлигини айтганди. Расмий Москвага кўра, Трамп бу ташаббусни фаол қўллаб-қувватлаган. 

Россия томони сулҳ тартиби 8-9 май кунлари амал қилишини маълум қилган.

Ушбу ташаббусга муносабат билдирган Зеленский 5 майдан сукунат режимини жорий қилишни таклиф этган.

«Биз инсонларнинг ҳаёти қандайдир санани «байрам қилиш»дан кўра қадрлироқ деб биламиз. Шу муносабат билан 5 май соат 00:00 дан бошлаб сукунат тартибини эълон қиламиз», – деган Украина раҳбари.

Таҳлилчилар фикрича, бу йил Россия ҳукумати парад орқали «мушакларини кўрсатиш» имконидан маҳрум.

Аввал хабар берганимиздек, эҳтимолий таҳдидларнинг ортиши фонида президент Путинни қўриқлашга қаратилган чоралар сезиларли даражада кучайтирилган. Россия раҳбари асосий вақтини бункерда ўтказаётгани, Путин ва унинг оиласи Москва вилояти ҳамда Валдайдаги одатий тураржойларига ташриф буюришни тўхтатгани айтилмоқда.