9-10 октябрь кунлари Душанбе шаҳрида бўлиб ўтадиган «Марказий Осиё – Россия» форматидаги иккинчи саммит ҳамда Мустақил Давлатлар Ҳамдўстлиги Давлат раҳбарлари кенгашининг навбатдаги йиғилиши доирасида бўлиб ўтаётган Путин ва Алиев учрашуви ўтган йилнинг 25 декабрида Қозоғистон ҳудудида қулаб тушиб, 38 нафар йўловчисини қурбон берган AZAL самолёти ҳалокатига доир мавзудан бошланди.

РИА нашрининг ёзишича, учрашувни мазкур мавзуда бошлашни Путин таклиф қилган.

Путин Алиевдан Россия осмонида AZAL самолёти билан боғлиқ фожиа учун узр сўраганини эслатиб, авиаҳалокатда ҳалок бўлганларнинг оила аъзоларига ҳамдардлик билдирди. 

Шунингдек, Россия келишувларга мувофиқ, Озарбайжон самолёти ҳалокатини тергов қилишда ҳар томонлама ҳамкорлик қилаётгани, самолётининг қулаши сабаблари, жумладан, осмонда Украина дронининг мавжудлиги билан боғлиқ бўлгани айтиб ўтилди.

«Фожиа юз берган куни AZAL самолёти уч Украина учувчисиз учоқларини эргаштириб, Россия чегарасини кесиб ўтган. Россия ҳаво ҳужумидан мудофаа тизими томонидан отилган иккита ракета эса Озарбайжон самолётига тўғридан-тўғри тегмаган, балки бир неча метр нарида портлаган. Йўловчи самолёти катта эҳтимол билан ракета парчаларидан зарарланган», – деди Путин Алиев билан учрашувда.

Путин, шунингдек, AZAL самолёти экипажига Махачқалъага қўнишга рухсат берилгани, бироқ улар ўз аэропортига боришга қарор қилганини айтди. Қолаверса, авиаҳалокатга алоқадор барча мансабдор шахсларнинг ҳаракатларига ҳуқуқий баҳо берилишини, бу борада Россия томони товон тўлаш учун барча зарур ишларни амалга оширишини маълум қилди.

Путин Алиев билан учрашувда мазкур авиаҳалокат билан боғлиқ вазиятни ҳал қилиш учун вақт кераклигини таъкидлади.

Эслатиб ўтамиз, AZAL самолёти бортида 67 киши, жумладан беш нафар экипаж аъзоси бўлган. Улардан 38 нафари вафот этган, 29 нафари тирик қолган.