Россия президенти Владимир Путин мамлакат тарихида ўтган Иван III, Пётр I, Екатерина II сингари ҳукмдорлардек “буюк” сифатига лойиқдир. Бу фикрни Россия президенти ҳузуридаги Тарихий хотира миллий маркази раҳбари Елена Малишева илгари сурди.

“Ҳукмдорлар нега буюк деб аталади? Чунки Россия тарихида ўтган Иван III, Пётр I, Буюк Екатерина бошқаруви даврида ижтимоий, иқтисодий, геосиёсий долғалар кузатилган ва улар мамлакатнинг келгуси тараққиётини белгилаш борасида масъулиятни ўз зиммаларига олишган. Мана, уларнинг буюклиги нимада!” – деган Тарихий хотира миллий маркази раҳбари. 

Унинг фикрича, Россия бугун ҳам номи зикр қилинган ҳукмдорлар давридаги каби вазиятни бошдан кечирмоқда ва Путин мамлакат тараққиёти бўйича жавобгарликни гарданига олиб муносиб фаолият юритмоқда. 

Елена Малишева наздида, бугун Россия жамиятида барча аҳоли кўтаринки руҳ ва юқори кайфиятда олға одим отмоқда. Буларнинг бари Путиннинг саъй-ҳаракати билан бўлаётганини таъкидлаган жамоат арбоби амалдаги президент номига “буюк” сифатини қўшишни таклиф қилган.

Маълумот ўрнида: аввалроқ Путин ҳам ўзини император Пётр Биринчига тенглаштириб, Украина босқинидан мақсад худди Пётр каби тарихий ерларни қайтариб олиш эканини айтган эди.