Рус сиёсатчилари АҚШ томонидан Шимолий Атлантикада Россия байроғи остида ҳаракатланаётган Marinera танкерининг қўлга олинишига жавобан кескин жавоб қайтаришни талаб қилмоқда.

Россия Давлат думасининг мудофаа масалалари қўмитаси раисининг биринчи ўринбосари Алексей Журавлёв АҚШ флотига торпедалар, яъни сувости снарядлари орқали ҳужум уюштириш керак деб ҳисоблайди.

“Торпедаларни ишга солиб ҳужум қилиш ва Американинг соҳилни қўриқлаётган бир неча катерини чўктириш керак... Ўйлайманки, Венесуэладаги махсус амалиётдан кейин ҳеч ким мушугини пишт демаган ва эйфория кайфиятида юрган АҚШни шу тариқа бурнига чертиш орқали тўхтатиш мумкин, холос”, – деган Алексей Журавлёв.

Дума вакили АҚШ флоти томонидан фуқаровий кеманинг зўрлик йўли билан эгалланишини қароқчилик ва Россия ҳудудига тажовуз деб атаган.

Журавлёвнинг фикрича, қўлга олинган кема яқинида Россия сувости ва ҳарбий кемалари бўлгани инобатга олинса, АҚШнинг ушбу хатти-ҳаракатига нисбатан кескин ва тезкор жавоб қайтариш керак. Депутат Россия ҳарбий доктринасида бундай ҳаракатлар учун ҳатто ядро қуролини қўллаш назарда тутилганини айтган.

Давлат думасининг бошқа бир аъзоси, генерал Андрей Гурулёв эса кема қўлга олинишига жавобан Европага “Орешник” ракеталари билан зарба бериш ва Қора денгизда уларнинг кемаларини чўктиришни таклиф қилган. Унинг таъкидича, АҚШ катта урушга ҳозирлик кўрмоқда ва денгиз қароқчилигини тўхтатиш учун муносиб жавоб чоралари қўллаш керак.

Аввал хабар берганимиздек, АҚШ 7 январь куни Шимолий Атлантикада Marinera танкери ҳибс этилганини эълон қилди. Президент Дональд Трамп санкциясига дучор бўлган танкер Венесуэла нефтини ноқонуний равишда ташишга урингани айтилмоқда.

Marinera эгалланиши ортидан Россия ташқи ишлар вазирлиги кема бортидаги Россия фуқароларига нисбатан инсоний муносабатда бўлиш, уларнинг ҳақ-ҳуқуқларини ҳимоя қилиш ҳамда уларнинг ватанига қайтишига тўсқинлик қилмасликни талаб этиб баёнот берди.

Оқ уй матбуот котиби Кэролайн Левитт Marinera кемаси экипажи АҚШ судида жавоб беришини маълум қилган.