АҚШ президенти Дональд Трамп Россияга қарши санкцияларни кучайтиришни назарда тутувчи қонун лойиҳасини қўллаб-қувватлашини айтди. Шу билан бирга, у Вашингтон бу қонунни амалда қўллашга мажбур бўлмаслигига умид билдирди.

Трампнинг айтишича, АҚШ аллақачон Россияга нисбатан жуда қаттиқ иқтисодий санкцияларни қўллаб келяпти. У Россия иқтисодиёти ёмон аҳволда эканини, бироқ мамлакат ҳажми ва қудрати жиҳатидан Украинадан анча катта эканини таъкидлади.

Бундан олдин сенатор Линдси Грэм мазкур қонун лойиҳаси бўйича овоз бериш келаси ҳафта ўтказилишини маълум қилган. Унинг сўзларига кўра, ҳужжат президентга Россиядан нефть ва газ харид қилишда давом этаётган давлатларга нисбатан иккинчи даражали санкциялар ва импорт божлари жорий этиш ҳуқуқини беради.

«Бугунги Президент Доналд Трамп билан бир қатор масалалар бўйича жуда самарали учрашувдан сўнг, у (Доналд Трамп, — таҳр.) Россияга қарши иккинчи даражали санкциялар тўғрисидаги қонун лойиҳасига рухсат берди.

Ушбу қонун лойиҳаси Президент Трампга арзон Россия нефтини сотиб олиб, Путиннинг уруш машинасини ёқилғи билан таъминлаётган мамлакатларни жазолашга имкон беради.

Шунингдек, бу ҳужжат Хитой, Ҳиндистон ва Бразилия каби мамлакатлар иқтисодига улкан таъсир кўрсатади. Бу эса уларни урушни молиялаштирувчи арзон Россия нефтини сотиб олишни тўхтатишга ундайди», – деб ёзган Грэм Х ижтимоий тармоғида. 

Қонун лойиҳасини Конгрессда демократлар ҳам, республикачилар ҳам кенг қўллаб-қувватлаётгани айтилмоқда.