Оқ уй Дональд Трамп АҚШ президенти лавозимига иккинчи бор киришганидан бери эришилган ютуқлар ҳақида ҳисобот берди. Маълумотларга кўра, ўтган 11 ой давомида: тарихдаги энг паст қотиллик кўрсаткичига, энг йирик солиқ камайтирилишига, энг йирик сондаги (600 минг нафар) ноқонуний мигрантнинг мамлакатдан чиқариб юборилишига ҳамда хусусий секторда 687 мингта янги иш ўрни яратилишига эришилган.

Оқ уй, шунингдек, Трамп жорий этган божлар АҚШга 235 миллиард доллар даромад (июль ойида АҚШ Молия вазири Скотт Бессент 300 миллиард доллар тушум кутаётганини айтган) келтирганини маълум қилган.

Қайд этилишича, божхона божларидан келган даромадлар 2025 йилнинг 20 январидан 15 декабригача бўлган давр учун ҳисобланган. Бу кўрсаткич аввалги йилларга нисбатан анча юқори: масалан, 2024 молиявий йилида АҚШ божхонадан бор-йўғи 77 миллиард доллар даромад олган эди.

Ушбу иқтисодий ютуқларга қарамай, NPR радиостанциясининг хабар беришича, америкаликларнинг мамлакат иқтисодий сиёсатидан мамнунлик даражаси бор-йўғи 36 фоизни ташкил этмоқда. Бу сўнгги олти йил ичида қайд этилган энг паст кўрсаткич.