Украина президенти Владимир Зеленский 21 ноябрь куни миллатга мурожаат қилиб, мамлакат тарихидаги энг мураккаб қарорлардан бири олдида турганини маълум қилди. Унга кўра, Украина «қадр-қимматиини йўқотиш» ёки «асосий ҳамкорини йўқотиш» хавфи ўртасида турибди.

Зеленскийнинг таъкидлашича, мамлакатга 28 та мураккаб шартлар таклиф қилинмоқда, акс ҳолда украинлар учун жуда оғир қиш кутиляпти.

«Биздан икки марта ҳужумига учраганимиз – қарши томонга (Россия) ишонишимизни кутишяпти. Улар аниқ жавобни сўраяпти. Биз эса хотиржам, бироқ тезкор тарзда АҚШ ва бошқа шериклар билан ишлаймиз. Душманга «Украина тинчликни истамайди» деган баҳона айтишига сабабларни қолдирмаймиз», – деди Зеленский.

У президент сифатида тинчлик режасида икки муҳим принцип сақланишини талаб қилишини билдирди: «украина халқининг шаъни» ва «эркинлиги».

«Биз барча имкониятни ишга соламизки, уруш тугасин, аммо Украина, Европа ва глобал тинчлик йўқ бўлмасин», – деди у.

Зеленский украин халқининг чарчаганини, аммо матонатини ҳам эътироф этди: «Биз тўрт йилдан бери улкан босқинчи армияни тўхтатиб турибмиз. Биз пўлатдек бақувватмиз, бироқ ҳатто энг мустаҳкам металл ҳам бир кун синаши мумкин».

Унинг айтишича, урушнинг биринчи куни украинлар босқинчига «орқа билан турмагани» мамлакат шаъни ва эркинлигининг энг катта белгиси бўлган.

«Россия учун энг қўрқинчлиси – украинларнинг бирдамлиги. Шу боис бугун бизга ички бирлик ҳар қачонгидан ҳам кўпроқ керак. Одамлар, фуқаролар, сиёсатчилар – тўпланишимиз, келишмовчилк ва сиёсий ўйинларни тўхтатишимиз керак», – деди Зеленский ички сиёсий низолар давлат манфаатларига зарар келтираётганини таъкидлаб.

У тинчлик музокараларида халқнинг қўллаб-қувватлаши жуда муҳимлигини таъкидлайди ва «ортида Украина халқи турганини билса», муносиб тинчликка эришиш ўзига осонроқ бўлишини айтади.

Зеленскийнинг айтишича, яқин кунларда Украинага босим янада ортади, душман эса жамиятни парокандаликка уринишда давом этади.

«Бизни бир-биримизга қарши қўйишга ҳаракат қилишади. Биз бу имкониятни душманга бермаслигимиз шарт», – деди у.

«Биз ичида бирлашишимиз керак. Мен ишонаман ва биламан – мен ёлғиз эмасман», – дейди Зеленский мурожаати якунида.