Маълумки, Қурбон ҳайити муносабати билан республика бўйлаб эҳтиёжманд аҳолини қўллаб-қувватлаш учун 680 миллиард сўм маблағ ижтимоий ёрдам ва тиббий хизматларга йўналтирилган эди. Бу пуллар кам таъминланган оилалар ҳамда оғир хасталикка чалинган беморларни даволашга сарфлашга қаратилган.

Шу нуқтайи-назардан, Ўзбекистон Республикаси Президентининг 2026 йил 21 майдаги 196-сон қарори ҳамда Соғлиқни сақлаш вазирлигининг тегишли буйруғига мувофиқ, Бухоро вилояти Болалар кўп тармоқли тиббиёт марказида ҳамда вилоят Онкология диспансерида оғир ва ногиронликка олиб келувчи касалликка чалинган болалар учун юқори технологияли жарроҳлик амалиётлари бошланди.

Бухоро вилоят Соғлиқни сақлаш бошқармаси бошлиғи Элёр Олтиевнинг «Xabar.uz»га маълум қилишича, юрак-қон томир, ортопедия, урология, нейрохирургия, ЛОР, кўз ва болалар жарроҳлиги йўналишларида юқори технологияли жарроҳлик амалиётларини амалга ошириш режалаштирилган. Шунингдек, «Вақф» хайрия жамоат фонди маблағлари ҳисобидан оғир ва ногиронликни келтириб чиқарувчи касалликларга чалинган

510 нафар бухоролик 0-18 ёшли болаларда жарроҳлик амалиётини ўтказиши кўрсатилган. 244 нафар болалар рўйхати шакллантирилган. 266 нафар болалар рўйхатини шакллантириш учун эса Бухорода яшайдиган 7042 нафар ногиронлиги бор ва ижтимоий ҳимоя реестрида турадиганлар тиббий кўрикдан ўтказилган.

— Болалар 12 йўналишдаги мутахассислар иштирокида чуқурлаштирилган тиббий-кўрикдан ўтказилди. Жараёнда лаборатория таҳлиллари, диагностик ва ультратовуш текширувлари, электроэнцефалограмма ҳамда кардиограмма каби замонавий текширувлар амалга оширилди. Кўрик якунларига кўра, жарроҳлик амалиётига муҳтож, деб топилган болалар мутахассислар назоратига олиниб, даволаш режаси шакллантирилди,—деди бошқармаси бошлиғи.

Таъкидланишича, Бухоро вилояти учун жами 500 нафардан зиёд 0-18 ёшдаги болаларга 74 та онкологик, онкогематологик ва гематологик ва 5 та трансплантация ўтказиладиган беморлар учун ваучерлар берилиши кўзланган. Бугунги кунга қадар 123 нафар онкологик, онкогематологик ва гематологик беморларга ваучерлар берилган.

Онкологик ва онкогематологик касалликларга чалинган 141 нафар, жигар, буйрак ҳамда юрак-қон томир касалликлари мавжуд 20 нафар болага махсус квоталар ажратилган бўлса-да, уларнинг сони чекланмагани таъкидланмоқда.

Бошқарма бошлиғининг айтишича, бугун, жорий йилнинг 2 июнь кунида вилоят Болалар кўп тармоқли тиббиёт марказида 8 нафар болага юқори технологик жарроҳлик амалиёти ўтказилган. Болалар соғлом ва саломатликлари назоратда. Бундай хайрли ишлар болажонларда келгусида кузатилиши мумкин бўлган ногиронлик ҳолатларининг олдини олишга қаратилган. Кейинги кунларда эса 125 нафар онкологик ва 16 нафар онкогематолик, онкологик, гематологик ва онкогематологик ташхиси қўйилган беморларда жарроҳлик амалиётлари бошланади.

Маълум бўлишича, жигар ва буйрак трансплантацияси, кўз шох пардасини кўчириш билан боғлиқ жаррохлик амалиётлари ҳам ўтказилади.

Ўтказилаётган юқори технологияли жарроҳлик амалиётлари кўплаб оилаларни йиллар давомида қийнаб келган муаммосига ечим бўлиб хизмат қилмоқда. Сабаби, бу жараёнларда барча харажатлар давлат мақсадли жамғармалари ва бошқа манбалардан ажратилган маблағлар ҳисобидан қоплаб бериляпти.

— Малакали мутахассислар ҳамда маҳаллий жарроҳлар ҳамкорлигида ўтказилаётган бу каби амалиётлар яқин-яқингача Тошкентда ёки чет давлатларда амалга оширилар эди. Бу эса нафақат, катта харажат, балки, узоқ навбатлар, стресс ва вақт йўқотишларга олиб келган. Давлатимиз раҳбарининг соҳага эътибори натижасида юрак хасталиги билан оғриган болалар маҳаллий шароитда ўз дардига даво топмоқда,—деди Элёр Олтиев.