Жорий йилнинг 2 январида ижтимоий тармоқларда Бухорода уюштирилган тўй кортежи турли муҳокамаларга сабаб бўлди. Бухоро вилоят ИИБ ЖХХ ЙҲХБ ахборот гуруҳи катта инспектори Умиджон Баракаевнинг «Xabar.uz»га маълум қилишича, ушбу ҳолат юзасидан тезкор ўрганиш ишлари олиб борилган.

Аниқланишича, Бухоро вилояти Қоракўл туманидаги тўйларнинг бирида турли русумда бўлган бир хил рангдаги ўндан зиёд автомашиналар гуруҳ бўлиб ҳаракатланишган. Боз устига, улар йўл ҳаракати қоидаларини қўпол равишда бузиб, ўз хатти-ҳаракатларини ижтимоий тармоқларда тарқатишган.

Қилмишларига жавоб беришга келганда эса «жўралар» дўстини хурсанд қилиш учун тўй кортежини уюштирганини ва бу хатти-ҳаракатларидан пушаймон эканлигини билдиришган.

Ушбу ҳолат ЙҲХБ ходимлари томонидан ўрганилиб, барча автомашиналар вақтинча сақлаш учун жарима майдонига жойлаштирилган. Уларга нисбатан Маъмурий жавобгарлик тўғрисидаги кодекснинг 129-моддаси (Транспорт воситалари ҳайдовчиларининг йўл ҳаракати хавфсизлигига таҳдид солувчи гуруҳ бўлиб ҳаракат қилишда қатнашиши) билан маъмурий баённома расмийлаштирилган.

Эслатиб ўтамиз, аввалроқ Ғиждувон туманида ҳам ўнга яқин фуқаролар ўзларига тегишли бўлган автомашиналарда гуруҳ бўлиб ҳаракатланиб, қоидабузарлик содир этган ҳолда тўй кортежини уюштиргани ҳақида хабар қилинган эди.