Ўзбекистонда 2026 йил давомида аҳоли орасида менингококк инфекцияси билан боғлиқ ҳолатлар бироз ошгани кузатилмоқда. Бу ҳақда Санитария-эпидемиология қўмитаси хабар қилди.

Маълум қилинишича, жорий йилнинг биринчи чорагида республика бўйича жами 174 та ҳолат рўйхатга олинган бўлиб, уларнинг 168 нафари 14 ёшгача бўлган болалар ҳиссасига тўғри келади.

Шу билан бирга, касаллик динамикасида ижобий ўзгариш кузатилмоқда: апрель ойида ҳолатлар сони март ойига нисбатан 14 фоизга камайган.

Инфекция тарқалишининг олдини олиш мақсадида Қўмита томонидан 8 024 доза вакцина харид қилинган, беморлар билан мулоқотда бўлган 4 862 нафар фуқаро эмланган. Тиббий қарши кўрсатмага эга шахслар учун эса шифокорлар назоратида кимёвий профилактика чоралари кўрилмоқда.

Маълумот учун, менингит — бу бош ва орқа мия пардалари яллиғланиши бўлиб, кўпинча бактерия ёки вируслар таъсирида юзага келади. Касаллик тез ривожланиши ва оғир асоратларга олиб келиши билан хавфли.

Мутахассислар қуйидагиларга амал қилишни тавсия этмоқда:

• ўз вақтида эмланиш;
• шахсий гигиена қоидаларига риоя қилиш;
• касаллик аломатлари пайдо бўлганда дарҳол шифокорга мурожаат қилиш;
• жамоат жойларида эҳтиёткорлик чораларини кўриш;
• «Ҳаж» ва «Умра» сафарларидан олдин эмланиш, қайтгандан сўнг эса оммавий тадбирлардан вақтинча чекланиш.

Санэпидқўмита маълум қилишича, республикада эпидемиологик вазият барқарор сақланмоқда ва инфекция тарқалишининг олдини олиш бўйича кенг кўламли чоралар амалга оширилмоқда.