Бухорода бир неча фуқаронинг молиявий ишончини суистеъмол қилган аёлга нисбатан суд ҳукми эълон қилинди. 

Бухоро шаҳрида бир-биридан фарқли уч нафар тадбиркорнинг ишончини қозониб, улардан тилла тақинчоқ ва кийим-кечакларни «бўлиб-бўлиб тўлайман», деган ваъда билан олган, кейин эса уларни сотиб, пулларини ўз эҳтиёжларига сарфлаб юборган фуқаро Д.Б.нинг хатти-ҳаракатларини Ўзбекистон Республикаси ЖКнинг 168-моддаси, 3-қисми, «б» банди билан такроран фирибгарлик, деб малакалади. Бу ҳақда «Xabar.uz»га Жиноят ишлари бўйича Қоракўл туман суди раиси Бобораҳим Очилов маълум қилмоқда.

Суд жараёни давомида маълум бўлишича, айбланувчи қисқа вақт ичида Н.Г., Ш.А. ва М.И. каби тадбиркор аёлларнинг ишончини суиистеъмол қилиб, умумий ҳисобда ўн минглаб АҚШ доллари қийматидаги мол-мулкни ноқонуний эгаллаган.

Д.Б. ўзи ишлаган гўзаллик салонидаги мулойим муомаласи ва «турмуш ўртоғим Европада ишлаб, катта пул юбориб туради», «салон ҳам, машина ҳам эрим томонидан совға қилинган» каби гаплар билан одамлар ишончини осонгина қозонган.

У биринчи жабрланувчи Н.Г.нинг дўконига бориб, тилла тақинчоқларни танишларига совға қилишини, пулни 3 ойда бериб қўйишини айтади. Ўз «салон»чисининг сўзига ишонган тадбиркор аёл унга 7 260 АҚШ доллари қийматидаги тилла буюмларни беради. Аммо, Д.Б. тиллаларни сотиб, пулларни қарзларини ёпиш ўрнида, шахсий эҳтиёжига ишлатиб юборади.

Худди шу усул Ш.А. билан ҳам такрорланган. Унинг ўз қариндошлари учун тилла олишини айтган Д.Б. бир неча марта «500 доллардан ҳафталик тўлов» ваъдаси билан қимматбаҳо олтин ва бриллиант зеб-зийнатларни қўлга киритган. У Ш.А.дан 6 945 АҚШ долларига тенг тақинчоқлар олиб кетган.

Тадбиркор аёл М.И. билан ҳам шундай ҳолатни юзага келтирган. «Европадан катта пул келади» деган гаплар билан ишонган тадбиркор Д.Б.га 1 800 долларлик аёллар кийим-кечагини бериб юборган.

Аввалига қилмишларини тан олмаган судланувчи ҳодисалар очиқланиб келавергач, ўз айбига тўлиқ иқрор бўлган. У қарзлари кўпайиб кетгани, танишларидан пул тополмагани боис, шу йўлни танлаганини важ келтирган.

Судгача бўлган жараёнда Д.Б. ҳар уч жабрланувчининг ҳам моддий зарарини тўлиқ қоплаб берган.

Жабрланувчилар судда: «Д.Б.нинг аёллар салонида ишлашини билганимиз, унинг ширинсуханлигига ишонганимиз учун ҳам катта миқдордаги мулкимизни бергандик»,-дейишган.

Суд ҳукми эълон қилишинида Д.Б.нинг аёллиги, оилавий шароити ҳамда ўз айбига иқрор бўлгани, шунингдек, жабрланувчиларнинг барча моддий зарарларини қоплаб бергани инобатга олинган. Шу сабабли унга суд озодликдан маҳрум этиш жазосини тайинламасдан, 2 йил муддатга ахлоқ тузатиш ишлари тартибини белгилаган.