Ўзбекистонда аҳолини уй-жой билан таъминлашни рағбатлантириш мақсадида ипотека бозорида янги механизм — «мақсадли ипотека омонати» амалиётини жорий этиш режалаштирилмоқда.

Ушбу ташаббус Президентнинг 2026 йил 24 февралдаги ПФ–29-сон фармони ижроси доирасида ишлаб чиқилган бўлиб, 2026 йил 1 июлдан бошлаб тажриба-синов тарзида амалга оширилиши кўзда тутилган.

Янги тизимнинг асосий ғояси — аҳолининг вақтинча бўш маблағларини уй-жой харидига йўналтириш. Фуқаролар ипотека кредити олишдан олдин махсус омонат ҳисобварағида маблағ жамғаради. Бу маблағлар кейинчалик дастлабки бадални шакллантиришда ишлатилади.

Бунда:
– тижорат банкларида махсус омонат ҳисоблари очилади;
– омонатларга бозор ставкаларида фоиз ҳисобланади;
– давлат томонидан субсидиялар ажратилади;
– жамғарилган маблағлар ипотека кредити учун мақсадли йўналтирилади.

Янги механизм икки томонлама самара беради. Биринчидан, фуқаролар учун уй-жой сотиб олиш имконияти кенгаяди – чунки улар олдиндан маблағ жамғариб, кредит юкини камайтиради. Иккинчидан, банклар учун узоқ муддатли молиявий ресурслар базаси шаклланади.

 Дастлабки бадалнинг бир қисми давлат субсидияси ҳисобидан қоплаб берилиши, ипотека фоизларининг маълум қисмига ҳам компенсация берилиши (5 йилгача) ҳамда фуқаро уй олмаса, омонат маблағлари фоизлари билан қайтарилиши каби шартлар қўшимча имкониятлар сифатида тақдим қилинмоқда.

 «Мақсадли ипотека омонати» тизими ипотека бозорида янги босқични бошлаб бериши мумкин. У нафақат аҳолининг уй-жойга бўлган эҳтиёжини қондиришга хизмат қилади, балки ички молиявий ресурсларни иқтисодиётга жалб қилиш орқали умумий иқтисодий барқарорликни ҳам мустаҳкамлайди.