Москвада Иккинчи Ғарбий округ ҳарбий суди «TBC Uzbekistan» банки маълумотлар базасининг собиқ аналитиги Евгений Серебряковни Россия Мудофаа вазирлиги полковниги машинасини портлатишда айбдор деб топиб, 25 йил озодликдан маҳрум этди.

Суд Серебряковни РФ Жиноят кодексининг 205-модда, 2-қисм (теракт содир этиш) ва 222.1-модда, 4-қисм ва 223.1-модда, 3-қисм (портловчи моддаларни ноқонуний сақлаш ва тайёрлаш) моддалари билан айбдор деб топди.

Шунингдек, унга 1 миллион рубль миқдорида жарима белгиланди. Прокуратура аввалроқ 28 йил талаб қилган эди.

У ўз айбини тўлиқ тан олгани қайд этилган.

Мудофаа адвокатининг таъкидлашича, Серебряковни Украина Хавфсизлик хизмати (СБУ)нинг кураторлари «манипуляция» қилган. Унга полковникни йўқ қилиш «урушни тўхтатади», деб ваъда беришган.

Портлаш 2024 йил 24 июль куни Москвадаги Синявинская кўчасида содир бўлган. Toyota Land Cruiser автомашинаси РФ Бош разведка бошқармаси полковниги Андрей Торгашов ва унинг рафиқаси унга ўтираётганда портлаган. Иккови ҳам яраланган.

Воқеадан кейин Серебряков Россиядан Туркияга қочган. У ана шу ерда қўлга олинган.

Манбаларга кўра, у Россиянинг Украинага қарши сиёсатига 2022 йилдан олдин ҳам қарши бўлган ва 2014 йилда Москвадаги урушга қарши намойишларда қатнашган.