Россия бюджетига нефть ва газ экспортидан тушадиган маблағлар кескин қисқарди. Reuters агентлиги маълумотларига кўра, 2025 йил ноябр ойида Кремлнинг энергия ресурсларидан олган даромади тахминан 35 фоизга пасайиб, 520 миллиард рубл (қарийб 5,7 миллиард евро)ни ташкил этди. Бу – сўнгги бир неча ойдаги энг паст кўрсаткичлардан бири.

Агентликнинг таъкидлашича, ноябрда даромаднинг кескин камайишига рублнинг мустаҳкамланиши ва энергоресурслар нархининг жаҳон бозорида тушиши сабаб бўлган. Бу икки тенденция эса Россия бюджетига салбий таъсир кўрсатган.

Украина билан уруш фонида мамлакат армия ва қудрат тузилмаларига харажатлар кескин оширилган. Ушбу соҳалар асосан энергия экспорти ҳисобидан молиялаштирилиб келинади. Ҳозирда нефть ва газдан тушадиган даромадлар Россия бюджети умумий тушумларининг тахминан чорак қисмини ташкил этмоқда.

Reuters агентлигининг ҳисоб-китобига кўра, 2025 йил январ–ноябр ойларида Россия энергия секторидан 8 трлн рубл даромад олган. Бу ўтган йилнинг шу даврига нисбатан 22 фоизга кам (2024 йилда – 11,13 трлн рубл). Шунингдек, бу кўрсаткич РФ Молия вазирлиги режасидан ҳам паст: 2025 йил учун 10,94 трлн рубл даромад режалаштирилган эди.

11 ойлик даврда Россия нефтьининг ўртача экспорти баҳоси 57,3 доллар/баррель бўлган. Бу ўтган йилга нисбатан қарийб 11 долларга арзон.