Самарқанддаги Expo кўргазмалар марказида "Eco Expo Central Asia 2026" халқаро экологик кўргазмасининг тақдирлаш маросими бўлиб ўтди. Унда кўргазма доирасида тақдим этилган стартап лойиҳаларнинг энг яхшилари эътироф этилди. Маълумот учун, жами 37 та стартап лойиҳа тақдим қилинди.

Хусусан, «SAWAB» стартап лойиҳаси 1-ўринга муносиб кўрилди. Лойиҳа муаллифлари наманганлик Саидамир Агзамов ва Бобурбек Асқаровлар озиқ-овқат исрофгарчилигини камайтиришга эътибор қаратишган ва бунга инновацион ёндашишган.

Қорақалпоғистон Республикасидан Шоҳида Карлибаева ва Мийратдин Ажиниязовларнинг «ECOPOTS» стартап лойиҳаси 2-ўринни эгаллади. Лойиҳада қўй жуни чиқиндиларини биологик парчаланадиган, ўсимликлар экиладиган идишларга айлантириш орқали экологик барқарор ечим яратилган, бу эса пластик ифлосланишни камайтиришга ҳисса қўшади.

3-ўрин Тошкент шаҳридан Акбарали Турдиев ва унинг жамоаси ишлаб чиққан “SMART FOREST” стартап лойиҳасига насиб этди. Лойиҳада сунъий интеллект асосидаги инновацион экологик мониторинг ечимлари ишлаб чиқилган бўлиб, ўрмонларни муҳофаза қилиш, ёнғинларни эрта аниқлаш ҳамда ақлли қишлоқ хўжалиги технологияларини ривожлантиришга ҳисса қўшади.

Шунингдек, Бухоро вилоятидан Муҳриддин Ёқубов ва Муинжон Наимовларнинг “Eco Mikrogreens” стартап лойиҳаси атроф-муҳитга сезиларли ижобий таъсир кўрсатгани ҳамда экологик барқарорликни таъминлашга қўшган муносиб ҳиссаси учун “Атроф-муҳитга энг катта таъсир кўрсатган лойиҳа”, Тошкент шаҳридан Оятуллоҳ Абдужабборовнинг “Eco Brick” лойиҳаси эса инновацион, технологияларга асосланган ва истиқболли экологик ечимни тақдим этгани учун “Энг инновацион экологик ечим” номинациялари билан тақдирланди.