Трамп Исроил бош вазирига Эронга қарши ҳарбий ҳаракатларда эҳтиёткор бўлишни тавсия қилганини маълум қилди.

Channel 12 телеканалига берган интервюсида Трамп сўнгги 24 соат ичида Нетаняху билан ўтказган суҳбати тафсилотларини очиқлади.

«Мен Бибига жуда эҳтиёткор бўлиш кераклигини айтдим. Тез орада Эронга қарши ёлғиз қолиб кетиши мумкинлигини тушунтирдим», – деди АҚШ президенти.

Трампнинг айтишича, у Нетаняхудан Эроннинг ракета ҳужумига жавоб қайтармасликни сўраган. Бироқ суҳбат якунланганда Исроил раҳбари қандай қарор қабул қилиши ҳақида аниқ маълумот бермаган.

Шундан кейин Нетаняху мамлакат мудофаа тизими раҳбарлари билан маслаҳатлашувлар ўтказган ва кейинчалик АҚШ давлат котиби Марко Рубиога Эронга зарба бериш ҳақида қарор қабул қилинганини маълум қилган.

Трампнинг таъкидлашича, Исроил томони АҚШни ҳужум ҳақида жуда кеч хабардор қилган.

«Исроил самолётлари аллақачон Эрон томон йўлга чиққан эди. Мен ҳужум кўламини қисқартиришга муваффақ бўлдим», – деди у.

АҚШ президентининг сўзларига кўра, минтақа давлатлари ҳам Вашингтондан Исроилнинг ҳарбий ҳаракатларини тўхтатиш учун босим ўтказишни сўраган.

Трамп яна Эрон томони ҳам АҚШ орқали Исроилга ҳужумларни тўхтатиш ҳақида мурожаат қилганини айтди.

Шу билан бирга, Трамп Вашингтон ва Теҳрон ўртасида келишувга эришиш имконияти сақланиб қолаётганини билдириб, Эрон ҳам бундай келишувдан манфаатдор эканини таъкидлади.