АҚШ президенти Дональд Трамп Россияга қарши янги санкциялар пакети бўйича қонун лойиҳасини имзолашга тайёр. Бироқ бу фақатгина Трампнинг санкциялар бўйича охирги қарор қабул қилиш ҳуқуқи сақланиб қолингандагина амалга ошиши мумкин.

Бу ҳақда Reuters агентлиги Оқ уй вакилига таяниб хабар бермоқда.

Оқ уй расмийси таъкидлашича, Трамп маъмурияти учун ҳар қандай санкциялар келишувида президентнинг якуний қарор қабул қилиш ваколатини кафолатловчи банд жуда муҳим ҳисобланади.

«Агар санкциялар пакетида президентнинг якуний қарор қабул қилиш ҳуқуқини кафолатловчи банд мавжуд бўлса, Президент қонунни имзолаш имконини кўриб чиқади», – деди Оқ уй вакили.

Расмий бу борада қўшимча маълумотларни келтирмаган.

Оқ уй вакилининг таъкидлашича, Трамп маъмурияти Россия билан Украинадаги урушни тўхтатиш бўйича музокараларни давом эттирмоқда. АҚШ расмийлари урушни дипломатик йўл билан якуний босқичга олиб чиқиш имкониятларини ўрганяпти.

Россияга қарши янги санкциялар бўйича икки партияли қонун лойиҳаси 2025 йил баҳорида тақдим этилган эди. Унинг муаллифлари – сенатор-республикачи Линдси Грэм ва сенатор-демократ Ричард Блюменталь.

Лойиҳа қуйидагиларни назарда тутади:

• Россия нефть ва газини сотиб оладиган мамлакатлардан АҚШга импорт қилинадиган товарларга 500 фоизлик бож жорий этиш – яъни «иккинчи даражали санкциялар»;
• Россиянинг энергетика экспортига босимни кучайтириш ва унинг даромад манбаларини чеклаш;
• Кремлнинг Украинадаги урушни давом эттириш имкониятларини қисқартиш.

Ушбу пакет Вашингтондаги энг қатъий санкция таклифларидан бири сифатида баҳоланмоқда.

Шу тариқа Трампнинг мазкур қонунни имзолашга розилиги унинг сиёсий ваколатларини сақлаш шартига боғлиқ бўлиб турибди. Конгрессдаги икки партияли қўллаб-қувватловга қарамай, санкциялар лойиҳасининг тақдири ҳозирча Оқ уйнинг ички музокараларига боғлиқ ҳолда қолмоқда.