Зеленский АҚШдан Украина учун тинчлик режаси лойиҳасини олди. 

Америка томонининг фикрига кўра, ҳужжат "дипломатияни кучайтириши" мумкин. Украина президентлик девони маълумотларига кўра, Зеленский лойиҳани Трамп билан муҳокама қилмоқчи. 

Девоннинг таъкидлашича, улар режа қоидалари устида "урушни муносиб якунлайдиган" тарзда ишлашга келишиб олишган. 

"Россия босқинининг дастлабки сонияларидан бошлаб Украина тинчликка интилди ва биз уни яқинлаштириши мумкин бўлган барча мазмунли таклифларни қўллаб-қувватлаймиз. Бу йил бошидан бери биз Президент Трампнинг қон тўкилишини тўхтатиш бўйича таклифларини қўллаб-қувватладик. Биз тинчликни таъминлаш учун Америка томони ва Европадаги ва бутун дунёдаги ҳамкорларимиз билан конструктив ишлашда давом этишга тайёрмиз", дейилади баёнотда. 

 Зеленский яқин келажакда АҚШ президенти билан келишув тафсилотларини муҳокама қилмоқчи. 

Аввалроқ АҚШ ва Россия расмийлари Украинадаги урушни тугатиш бўйича яширинча кенг кўламли режа ишлаб чиқаётгани ҳақида хабар берилганди. У 28 банддан иборат бўлиб, тўртта соҳани қамраб олади: Украинадаги урушни тугатиш, хавфсизликни таъминлаш, Европада барқарорликни мустаҳкамлаш ва АҚШнинг Россия ва Киев билан келажакдаги муносабатларини ўрнатиш.