Жаҳонда 2025 йил бошидан буён чикунгуня безгаги билан касалланишнинг 445 мингдан ортиқ тасдиқланган ва тахмин қилинган ҳолатлари қайд этилди. Касалликдан 155 киши вафот этди, деб баёнот берди Жаҳон соғлиқни сақлаш ташкилоти (ЖССТ).

Ташкилот касалликнинг дунё бўйлаб янада кенг тарқалиш имкониятини юқори деб баҳолади.

Касалланиш ҳолатлари 40 та мамлакатда қайд этилган.

2025 йилда чикунгуня, айниқса, Америка мамлакатларига қаттиқ таъсир кўрсатди — йил бошидан буён 100 329 та тасдиқланган ҳолат ва 228 591 та тахмин қилинган ҳолат қайд этилган, 115 киши вафот этган. Кейинги ўринларда Европа (56 456 та тасдиқланган ҳолат, 40 таси ўлимга олиб келган) ва Жануби-Шарқий Осиё минтақаси (3 420 та тасдиқланган ва 21 299 та тахмин қилинган ҳолат).

Чикунгуня — иситма, бўғим ва мушакларда кучли оғриқ, кўнгил айниши, чарчоқ, тошмалар, бўғимларнинг шишиши каби белгилар билан кечадиган хасталик. Касаллик ташувчилари Aedes aegypti ва Aedes albopictus туридаги чивинлар бўлиб, улар бошқа вирусларни, шу жумладан Денге безгагини ҳам юқтириши мумкин.