Украина президенти Владимир Зеленский Россия президенти Владимир Путинга очиқ мактуб йўллаб, урушни тўхтатиш учун шахсан учрашув ўтказишни таклиф қилди. Ҳужжат Украина президентининг расмий сайтида эълон қилинди. 

Мактубда Зеленский уруш Россия учун тобора кўпроқ салбий оқибатлар келтираётганини таъкидлаб, мамлакат аҳолиси дронлар ва ракета ҳужумлари, ёқилғи танқислиги, турли чекловлар ҳамда эҳтимолий мобилизациядан норози эканини қайд этган.

Украина раҳбари разведка маълумотларига таяниб, май ойида фронтда 30 минг нафар россиялик ҳарбий ҳалок бўлгани ёки оғир яраланганини билдирган. Унинг таъкидлашича, Россия армияси йўқотишларининг 63 фоизини ҳалок бўлганлар, 37 фоизини эса яраланганлар ташкил этмоқда.

Зеленский Путинни нейтрал давлатлардан бирида шахсий музокара ўтказишга чақирган. У Швейцария, Туркия ёки араб давлатларини эҳтимолий учрашув майдони сифатида тилга олган. Шу билан бирга, Москвада учрашув ўтказиш таклифини яна рад этган.

Украина президентининг фикрича, АҚШ ва Европа давлатлари ҳам музокараларда иштирок этиши лозим. Унинг айтишича, уруш Европа ҳудудида кечаётгани ва айнан ушбу давлатлар хавфсизлик кафолатларини таъминлаши мумкинлиги сабабли уларнинг иштироки мантиқий ҳисобланади.

Мактубда яна бир қатор таклифлар илгари сурилган. Жумладан, амалдаги фронт чизиғида ўт очишни тўхтатиш, сулҳга риоя этилишини АҚШ назорат қилиши ва ҳарбий асирларни «барчани барчага» тамойили асосида алмашиш таклиф этилган.

«Агар сиз бу урушни тугатиш вақти келганини англаб етмасангиз, Украина ўз мавжудлиги учун курашни давом эттиради. Бизга ёрдам берадиганлар бўлади. Аммо сиз ҳам ўз мавжудлигингиз учун кўпроқ курашишингизга тўғри келади», – деб ёзган Зеленский.

Украина ташқи ишлар вазири Андрей Сибига мазкур мактуб дипломатик каналлар орқали ҳам Россия томонига расман етказилишини маълум қилди. У Киев Москвадан ушбу таклифга мазмунли жавоб кутаётганини таъкидлади.