Qirg‘iziston Milliy xavfsizlik davlat qo‘mitasining sobiq rahbari Qamchibek Tashiyevga nisbatan Qirg‘iziston Jinoyat kodeksining ikki moddasi bo‘yicha ayblov qo‘yildi. Bu haqda Kaktus.media nashriga advokat Ikramidin Aytkulov ma’lum qilgan.

Uning so‘zlariga ko‘ra, Tashiyevga Jinoyat kodeksining 326-moddasi – hokimiyatni zo‘ravonlik bilan egallash yoki ushlab turish, shuningdek konstitutsiyaviy tuzumni zo‘ravonlik yo‘li bilan o‘zgartirishga qaratilgan harakatlar bo‘yicha ayblov e’lon qilingan.

Shuningdek, unga 337-modda – mansab vakolatlarini suiiste’mol qilish bo‘yicha ham ayblov qo‘yilgan. Xususan, gap ushbu moddaning 2 va 4-qismlari haqida bormoqda, ya’ni shaxsiy manfaat yoki boshqalar uchun foyda olish maqsadida amalga oshirilgan harakatlar hamda mas’ul lavozimni egallab turgan mansabdor tomonidan sodir etilgan huquqbuzarliklar.

Ma’lum bo‘lishicha, Tashiyevga nisbatan ehtiyot chorasi sifatida mamlakatdan chiqmaslik to‘g‘risida tilxat olingan. Advokatning ta’kidlashicha, uning mijozi qo‘yilgan ayblovlarni tan olmayapti.

Shu bilan birga, mazkur ish doirasida Qirg‘izistonning sobiq bosh prokurori Kurmankul Zulushev va parlamentning sobiq spikeri Nurlanbek Turgunbek uulu ham tilga olinmoqda. Biroq ularga nisbatan vaziyat hozircha aniq emas.