АҚШ ва Эрон ўртасидаги музокаралар яқин кунларда қайта тикланиши мумкин. Манбаларга кўра, томонлар Исламабодда учрашувни давом эттириш имкониятини кўриб чиқмоқда.

Маълум қилинишича, дам олиш кунлари бўлиб ўтган музокаралар натижасиз якунланганидан сўнг Вашингтон Эрон портларига нисбатан қамал жорий этган эди.

Шу билан бирга, дипломатик алоқалар давом этиши мумкинлиги ҳақидаги сигналлар нефть бозорига таъсир кўрсатиб, нархлар 100 доллардан пастга тушди.

Ҳозирча музокаралар учун аниқ сана белгиланмаган, аммо жума–якшанба кунлари орасида учрашув ўтказилиши мумкинлиги айтилмоқда.

Эслатиб ўтамиз, уруш бошланганидан бери Эрон Ҳўрмуз бўғозида ҳаракатни кескин чеклаб, ўтишни ўз назорати остига олган. Бунга жавобан АҚШ Эрон портларига кириб-чиқувчи кемаларни тўсишни бошлаган.

Шу билан бирга, АҚШнинг айрим иттифоқчилари, жумладан Британия ва Франция блокадада иштирок этмаслигини маълум қилган.

Хитой эса бу ҳаракатни «хавфли ва масъулиятсиз» деб баҳолаб, вазият кескинлашишидан огоҳлантирган.