Дания ташқи ишлар вазирлигида АҚШ президентининг Гренландия бўйича баёнотларини «ҳар кеча» кузатиб борувчи шахс пайдо бўлди. Бу ҳақда Politiken нашри хабар берди.

«Доналд Трампнинг босимига қарши туриш учун Дания дипломатик жиҳатдан қуролланмоқда. АҚШ президентининг таҳдиди (Гренландия масаласида — таҳр.) туфайли Дания ҳукумати ва дипломатияси бир неча бор юқори тайёргарлик ҳолатига келтирилганидан сўнг бу юз берди», — дейилади нашр хабарида.

Қайд этилишича, кечаси билан навбатчиликда турган «қоровул» Трампнинг ҳар бир баёнотини кузатиб боради.

Трамп Гренландияни қўлга киритмоқчи бўлганидан сўнг, Дания ҳукумати янги кемалар ва самолётлар сотиб олиш учун 8,5 миллиард доллар ажратмоқчи эканлиги ҳақида октябр ойида The Wall Street Journal нашрида мақола чиқди.

Август ойида Даниянинг DR телерадиокомпанияси Трампга алоқадорлиги тахмин қилинаётган шахслар орол ва Дания ўртасида келишмовчилик келтириб чиқаришга уриниб, Гренландияда яширинча ҳаракат қилаётгани ҳақида хабар берганди. Таъкидланишича, улар оролнинг Қўшма Штатларга қўшилишига замин ҳозирлаш мақсадида АҚШга мойил ва мойил бўлмаган бўлмаган гренландияликлар ҳақида маълумот тўплашмоқда.

Эслатиб ўтамиз, Трамп Канада ва Гренландия АҚШ таркибига кириши кераклигини кўп таъкидлаб келади. Қолаверса, у Панама каналини ҳам АҚШ назоратига қайтармоқчи. Табиийки, Трампнинг куракда турмас баёнотларига Панама, Канада ва Дания расмийлари кескин муносабат билдирган.