Дунёдаги энг йирик халқаро аэропортлар орасида Жоржия штатининг Атланта шаҳридаги Ҳартсфилд-Жексон алоҳида ажралиб туради. 2024 йилда аэропорт 108 миллиондан ортиқ йўловчига хизмат кўрсатди — бу мутлақ рекорд.

Атланта энг гавжум аэропортлар рейтингида етакчилик қилишининг бир неча сабаблари бор. Аввало, у АҚШнинг 80 фоиз ҳудудига 2-3 соатлик парвоз масофасида жойлашган. Бу ердан дунёнинг 225 та шаҳрига парвоз қилиш мумкин, Антарктидадан ташқари барча қитъаларга рейслар амалга оширилади. Трафикнинг 85 фоизи ички рейсларга тўғри келади.

Қолаверса, Атлантада дунёдаги энг узун ўтиш тизими мавжуд. Автоматик юк ташиш тизимининг 100 км конвейерда соатига 60 мингта жомадон сараланади. Йўловчилар SkyTrain (тезюрар поезд) орқали терминаллар ўртасида ҳаракатланишади.

Энг гавжум аэропортлар рейтингида иккинчи ўринда — Дубай аэропорти (йилига — 92,3 млн йўловчи), ундан кейин АҚШнинг Даллас/Форт-Уэрт (85 млн йўловчи), Токионинг Ҳанеда, Лондоннинг Ҳитроу аэропортлари жойлашди. Гонконг аэропорти эса юк ташишлар бўйича етакчи (йилига 5 млн тонна юк ташилган).