Канадада бўлиб ўтган икки кунлик учрашувдан сўнг «Катта еттилик» (G7) ташқи ишлар вазирлари биргаликдаги баёнот чиқариб, Россияга нисбатан иқтисодий харажатларни оширишини ва Москва урушини молиялаштираётган шахслар ва тузилмаларга қарши чоралар кўриш имкониятларини ўрганаётганини маълум қилди.

Учрашув якунида вазирлар Украина ва Судандаги вазият бўйича бирдамликни намойиш этдилар, бироқ АҚШнинг Кариб денгизи ҳудудидаги ҳарбий зарбалари ёки савдо масалаларини муҳокама қилишмади.

Канада Россияга қарши қўшимча санкциялар жорий этишини, хусусан, дронлар ишлаб чиқариш ва жорий этишда иштирок этаётган шахсларга нисбатан чекловлар қўлланишини маълум қилди. Бир кун олдин эса Буюк Британия Украинанинг энергетика инфратузилмасини тиклаш учун маблағ ажратишини эълон қилган эди.

АҚШ давлат котиби Марко Рубио янги ташаббуслар ҳақида аниқ баёнот бермаган бўлса-да, у ижтимоий тармоқда Украинани қўллаб-қувватлаш ва урушни тугатиш йўлларини муҳокама қилганини билдирди.

«Биз Украинага ёрдам бериш учун зарур бўлган барча чораларни кўряпмиз», – деди Канада ташқи ишлар вазири Анита Ананд.

Бутун иттифоқ Президент Дональд Трампнинг савдо сиёсатидаги талаблари, айниқса унинг турли тарифларни жорий этиши ортидан жиддий босимга дуч келмоқда.

Яқинда Трамп Онтарио ҳукумати АҚШда антитариф реклама кампаниясини бошлаганидан норози бўлиб, Канада билан савдо музокараларини тўхтатган эди.

«Мен бу ерда G7 ташқи ишлар вазирлари масъуллигидаги ишлар ҳақида гапириш учун келганман. Ва менимча, шуни муҳокама қилишим лозим», – деди Ананд.

Рубиога кўра, АҚШнинг Кариб денгизи ва Тинч океан шарқидаги ҳарбий операциялари ҳақида ҳам сўз очилмаган.

«Бу масала бир марта ҳам кўтарилмади», – деди у журналистларга.

Шунингдек, Рубио Буюк Британия АҚШ билан разведка маълумотларини баҳам кўришни тўхтатди деган хабарларни рад этди.

G7 баёнотида вазирлар Судандаги зўравонлик кучайишини ҳам кескин қоралади. Рубио гуманитар вазият ёмонлашганини таъкидлаб, Судандаги «Тезкор қўллаб-қувватлаш кучлари» (RSF)га қўлланилаётган ташқи ҳарбий ёрдамни тўхтатиш зарурлигини билдирди.

Журналистларнинг БААнинг RSF’га ёрдам бериши ҳақидаги саволига Рубио шундай жавоб берди:

«Биз кимлар уларни қўллаб-қувватлаётганини биламиз. Бу борада тергов олиб борилмоқда ва тегишли томонларга босим ўтказиляпти. Бу ёрдам тугатилиши шарт.»

Маълумот учун, G7 таркиби – Канада, АҚШ, Буюк Британия, Франция, Германия, Италия ва Япония.
Канада учрашувга шунингдек Австралия, Бразилия, Ҳиндистон, Саудия Арабистони, Мексика, Жанубий Корея, ЖАР ва Украина ташқи ишлар вазирларини ҳам таклиф этди.