Жанубий Корея президенти Шимолий Корея билан тинчлик музокараларини таклиф қилди.

Президент Ли Чже Мён Шимолий Кореяга икки мамлакат ўртасидаги урушни тугатиш ва Пхеньян ядровий дастурини ривожлантиришни тўхтатиш чораларини муҳокама қилиш учун тўғридан-тўғри музокараларни бошлашни таклиф қилди.

Ли бу таклифни 15 август куни Кореянинг Япония мустамлакачилигидан озод қилинганининг 81 йиллигига бағишланган маросимда билдирди.

Президент Сеул ва Пхеньянни ўзаро таҳдидлардан воз кечишга ва можарода бевосита иштирок этувчи томонлар сифатида музокараларни бошлашга чақирди. Унинг сўзларига кўра, мулоқот Шимолий Кореянинг ядровий арсеналини янада ривожлантиришни тўхтатиш йўлларини топишга ёрдам бериши мумкин.

Ли Чже Мён "беқарор сулҳ тизими"ни тинчлик режими билан алмаштириш ниятини билдирди. Шунингдек, у ҳарбий кескинликни камайтирадиган, қарама-қаршилик даражасини назорат қиладиган ва потенциал инқирозларнинг олдини оладиган кўп қатламли хавфсизлик тизимини яратишни таклиф қилди.

"Умид қиламанки, Жанубий ва Шимолий Корея тинч-тотув яшаш ва ўзаро ривожланиш учун музокаралар столига ўтиришади", деди сиёсатчи.

Бироқ, икки мамлакат ўртасидаги муносабатлар таранглигича қолмоқда. Шимолий Корея етакчиси Ким Чен Ин илгари Жанубий Корея билан бирлашиш сиёсатидан воз кечган ва уни энг душман давлат деб атаган эди.

Пхеньян Лининг мулоқотни тиклаш бўйича таклифларини рад этди, Сеулнинг ядровий сув ости кемаларини қуриш режаларини танқид қилди ва АҚШ-Жанубий Корея қўшма ҳарбий машқларини провокация деб атади.

Жанубий ва Шимолий Корея расман уруш ҳолатида қолмоқда. 1950-1953 йиллардаги Корея уруши сулҳ билан якунланди, аммо икки томон ўртасида ҳеч қачон тинчлик шартномаси имзоланмаган.